Gestur Svavarsson

Framhald

2009-01-05T23:04:00.002Z

Mánudagar, fyrsti venjulegi á árinu. Vinna og fundur VG í Habbnó. Vinnan var fín. Lofaði að gera fullt af hlutum fyrir miðvikudaginn. Klára það þá bara.

Tómas hringdi og ég hjálpaði honum með enduruppsetningu á Dell 5100 vélinni sem hann er með. Massavél sem er trúlega endingarbesta vél sem Dell hefur puðrað frá sér.

Fésbúkk vinurinn í dag er þessi:
Býr núna í Danmörku ásamt sínum ektafelli. Er mikil vinkona mágs míns, en mér skilst einmitt að mægðir rofni ekki þrátt fyrir sambandsslit, hehe.

Hún og ég eigum 33 sameiginlega vini - en hittumst ekki reglulega. Hún skrifar reglulega um bækur og eiginlega líka um það sem þeim tengist. Hún er fyrirmyndar.

Utan dagbókar

2009-01-04T19:53:00.003Z

Það er skrýtið að Ingibjörg Sólrún lét í veðri vaka að um e-r ráðherrahrókeringar yrðu. Sögusagnir flugu um að Þorgerður yrði utanríkisráðherra. Það finnst mér ósennilegt.

1. Vill ekki ISG vera með samningana um ICE-SAVE undir sinni stjórn eins og nú er? Þá er hægt að gá hvort ekki megi gera það og ESB að sama málinu.

2. Þær eru ekki með sömu afstöðu til árásarinnar á Gaza ströndina.

Annars skil ég ekki (frekar en oft áður) af hverju e-r er í ríkisstjórn, en segir líka að fjölmargar ástæður hafi verið til þess að slíta stjórnarsamstarfinu.

Borgarferð til Reykjavíkur

2009-01-04T19:44:00.003Z

3. jan 09
Stemmingsdagur. Byrjaði á bíói með stelpunum - fór á Bolta í þrívídd. Það var fínt. Síðan skveruðust þær í pössun á meðan við hjónin fórum inn til Reykjavíkur í sollinn. Ljómandi fínt, fórum fyrst aðeins í sundlaugina í Laugardal og tékkuðum síðan inn á hótel 1919. Þar fengum við fínasta herbergi með útsýni yfir pylsuvagninn. Þetta var 35 fermetrar í það heila - risastórt bað og svona.

Ha bruðl, nei sko það þarf að nýta flugpunktana sem safnað var f.kr. Fórum líka út að borða og þetta var bara ljómandi.

4. jan 09
Tékkað út af hótelinu, ekki mikill morgunmatur og heilsan í samræmi við afrek gærkveldsins. Það er greinilegt að úthaldið til skemmtana minnkar með árunum. Í dag verður það bara hamborgari, lítið um það að segja.

Eigum við að prófa að logga árið?

2009-01-02T21:57:00.003Z

Best að byrja:
1.1.2009
Í gær var frameftirsofið. Kláraði bókina sem ég man aldrei hvað heitir, - byrjar alltaf að heita dúkkusmiðurinn hjá mér, en heitir víst Skaparinn e. Guðrúnu Evu Mínervudóttur. Bókin er skemmtileg, bókin í fyrra var skemmtilegri en þessi var betri.

Ég veit ekki enn hvað ég les næst.

Nýársmaturinn var bara svona ditturinn og datturinn. Það er ekki hægt að borða veislumat á hverjum degi.

2.1.2009
Fór í vinnunna, vinn í tölvudeild lítils íslensks banka. Hélt áfram að fara yfir kerfisbókhaldið hjá okkur, eða listann yfir þau kerfi sem við þjónustum. Fann kerfi sem hafði sem lágmarkskröfu IE5, því það nýtir DHTML. Fyndið finnst þeim nördum sem hingað rekast.

Í hádeginu var skroppið með Dóru í einn rúnt og sameiginlegur hádegismatur. Það var auðvaldsmáltíð hjá McD. Ostborgari og Miðlungssjeik. 500 kall á kjapt, ágætt verð.

Aftur í vinnunna.

Facebook vinurinn sem lýst er í dag er valinn af handahófi. Valið fer þannig fram að ég fer á mína síðu og vel einn af þeim sem birtast á henni.

Að þessu sinni er það nokkur sem bjó ekki langt frá mér, en ég held sé nú kominn til fyrirheitna landsins - hins nýja 101, sem er TADAAAA - 107. Viðkomandi er snilldarskáld en hefur líka magnaða útvarpsframkomu. Útvarpsþátturinn sem er í umsjón þessarar ágætu persónu og nokkurra annarra er með betra útvarpsefni á Íslandi.
. . .og gettu nú.

Fundur í Hafnarfirði um samgöngumál - biðraðirnar löngu

2008-04-19T00:08:00.004Z

Á sunnudaginn kemur klukkan 14:00 verður fundur í Fjörukránni í Hafnarfirði um samgöngumál á suðvesturhorninu. Við ætlum fyrst og fremst að ræða um samgöngumál höfuðborgarsvæðisins eins og Hafnfirðingar þekkja það, en auðvitað er höfuðborgarsvæðið farið að teygja sig austur á Selfoss, vestur á Skaga og Borgarnes og suður til Keflavíkur.

Árni Þór Sigurðsson verður framsögumaður, en hann hefur starfað að samgöngumálum og skipulagsmálum í mörg ár.

Það verður spennandi að heyra umræðurnar á fundinum um biðraðirnar, léttlestir, eldsneytið, umhverfið, strætó og allt þetta sem tilheyrir borgarverundinni.

Fjörukráin klukkan 14:00 - á sunnudag.

Sinnep

2008-04-11T18:56:00.004Z

Nú í kvöld er sinnepskvöld.

Fyrir nokkrum mánuðum fórum við hjónakorn til Parísar, og römbuðum inn í sinnepsbúð (þetta er gaman að skrifa svona, búandi í Hafnarfirði). Þar keytum við ásamt öðru, tvær dósir dijon-sinneps. Önnur var með trufflusveppa íblöndun, hin banana.

Já, banana.

Báðar voru afar góðar.

Nokkru síðar komu bróðir minn og mágkona frá sama stað - og færðu okkur mikið úrval sinnpestegunda. Þau koma síðan í kveld og setjast að sinnepssnæðingi.

Nú í kvöld er sinnepskvöld.

Karlakór Reykjavíkur

2008-04-09T22:35:00.002Z

Jæja, nú hef ég verið í Karlakór Reykjavíkur síðan um ármót, og það hefur verið vel þess virði só far, og vel það. Ég er reynslufélagi, en það verður maður í heilt ár. Þetta er fyrsti karlaklúbburinn sem ég er í og þessi er algerlega prýðilegur.

Ég fór í það að skoða hvort ég væri ekki skyldur einhverjum af þessum snillingum - en hef engan fundið enn. Á eftir að skoða bassana; tenórarnir eru mest tengdir mér í sjötta lið. Það telst nú varla mikið. Þarna er nú samt Breiðfirðingurinn Arilíus - sem mér finnst ég vera skyldur, af því að hann telur Flatey á Breiðafirði til helgari staða landsins eins og mér.

Það var æfingaferð um daginn, í Úthlíð. Þar hittum við Björn Úthlíðarjarl - sem er sérstakur velunnari þessa kórs. Hann er lifandi sönnun þess að í Evrópu tíðkast enn að höfðingjar reisi sér kirkju. Sagan endurtekur sig - heldur áfram og allt er eins og áður en samt svo nýtt.

Mér finnst gott og heibrigt að sjá að enn höfum við Íslendingar einhverjir ríkulegar sjálfstæðisþarfir. Mér finnst vænt um þær.

Evrópusambandið og sjálfstæð utanríkisstefna

2008-03-11T18:26:00.006Z

Stjórnmálamönnum er ekki stætt á því að nýta stöðu íslenska gjaldmiðilsins sem rök fyrir því að fara í Evrópusambandið og taka upp evru. Ef allar þjóðir sem hafa annan gjaldmiðil og standa utan ESB stæðu tæpt með sinn gjaldmiðil, þá mætti skoða það sem rök.

Það er t.d. athyglisvert að skoða yfirlýsingar forseta Íslands í útvarpinu:

http://ruv.is/heim/frettir/frett/store64/item196338/

Ísland á erindi í Öryggisráð SÞ
Forseti Íslands, Ólafur Ragnar Grímsson, segir margar ástæður fyrir því að Ísland eigi erindi í öryggisráð Sameinuðu þjóðanna. Hann segir það hafa komið Íslandi til góða í kosningabaráttunni að vera ekki í Evrópusambandinu. Ísland sækist eftir sæti í öryggisráði SÞ á næsta og þarnæsta ári.

Nú er það ekki svo að ég sé sammála því að Ísland eigi að sækja um þetta sæti. Enda er það ekki meginumræðan, heldur hitt að sjálfstæð utanríkisstefna opnar fyrir okkur ýmsar dyr á alþjóðavettvangi.

Þetta er ekki einstakt dæmi. Ég man eftir því þegar utanríkisráðherra fór til Ghana á leiðtogafund Afríkusambandsins. Þá þótti kostur að vera utan ESB. Kostur að hafa sjálfstæða utanríkisstefnu. Sama gildir líka um heimsókn okkar til Palestínu. Þar kom einnig fram að það opnaði okkur dyr til þess að heimsækja báða aðila að vera utan ESB. Einnig mætti minna á samkomulag eins og þetta:

http://trade.is/Frettir/338/default.aspx

sem væri erfitt án þess að standa utan við ESB.

Mörg þeirra dæma sem ég hef talið upp hér að framan eru ekki endilega gjörningar sem ég kýs að styðja. En það er mikilvægt að verja möguleika okkar á því að geta gert hluti af þessu tagi.

ESB er efnahagsbandalag, en ESB inniheldur aðeins brot af veltu alls efnahags allra þjóða. Er ekki hag Íslands þá best borgið utan ESB?
http://xv.is/stefna/utanrikisstefna/

Starfsmannaskortur í einkaskólum

2008-01-29T22:40:00.000Z

Á dögunum barst til fræðsluráðs Hafnarfjarðar bréf frá formanni stjórnar sjálfstæðra skóla á Íslandi, fyrir hönd stjórnarinnar. Formaðurinn er Margrét Pála Ólafsdóttir.

Erindið fannst mér með nokkrum ólíkindum, en það snerist í megindráttum um ef fjárframlög hækka til sameiginlegu skólanna, skólanna okkar allra, þá skuli þau einnig hækka með sambærilegum hætti til einkaskólanna. Þannig ætti það alltaf að vera.

Tillaga meirihlutans, sem studd var af Sjálfstæðisflokki fól í sér ríflega einar milljón króna framlags á mánuði til leikskóla Hjallastefnunnar í Hafnarfirði. Ég sat hjá og bókaði eins og sjá má við fimmta lið: http://www.hafnarfjordur.is/hafnarfjordur/fundargerd_nanar/?ec_item_9_id=1af81767-70bf-47c2-a470-be7c8d67a992.

Það er löngu tímabært að hlúa frekar að samfélagsskólunum, sem við eigum öll, enda eru verkefnin ærin þar. fimmtán milljónir á ársgrundvelli má nýta í ýmis önnur verkefni.

Þess má geta að þau börn sem ég þekki á Hjalla eru hress, glöð og kát, a.m.k. hafa dætur mínar haft það gott þar, önnur er reyndar nú komin í skóla.

p.s. Nokkuð langt síðan ég skráði færslu hér seinast. Hef annars skipt um vinnu, starfa nú í UT sviði eins bankanna hérna heima.

Barnasáttmáli S.Þ. í Hafnarfirði og VG

2007-12-21T12:05:00.000Z

Síðari umræða fjárhagsáætlunar í Hafnarfirði var í vikunni. Okkar frábæri bæjarfulltrúi VG lagði fram nokkrar tillögur, þar á meðal eina sem mér finnst frábær:

Kynning á barnasáttmála Sameinuðu þjóðanna

Bæjarstjórn Hafnarfjarðar samþykkir að fela bæjarlögmanni að vinna að kynningu á barnasáttmála Sameinuðu þjóðanna sem hægt verði að nota í grunnskólum bæjarins frá og með hausti 2008.

Samkvæmt samningnum ber aðildarríkjunum að kynna efni hans með virkum hætti jafnt fyrir börnum sem fullorðnum. Það er því kjörið að Hafnarfjörður sýni gott fordæmi og hefði kynningu á sáttmálanum fyrir börnum sveitarfélagsins.

Um fundinn má sjá hér: http://www.hafnarfjordur.is/hafnarfjordur/fundargerd_nanar/?ec_item_9_id=86d060ab-be8b-4ca4-a465-1cefb418d48b

Drukknir sjómenn og utanbæjarmenn

2007-12-13T12:36:00.000Z

Fyrirsögnin hér að ofan er tekin frá innsendri grein í fréttablaðið eftir Grím Sæmundsson. Án frekari málalenginga bendi ég fólki á að lesa greinina. Hún er stórgóð.

http://www.visir.is/article/20071213/SKODANIR03/112130246

Einkaframtakið skilar ekki betri rekstri!

2007-12-07T12:52:00.000Z

Því hefur lengi verið haldið fram af fylgjendum frjálshyggjunnar að ein af rökunum fyrir að einkavæða opinber fyrirtæki séu þau að maður fari einfaldlega betra með það sem maður á sjálfur en það sem allir eiga. Þessu hafa Vinstri græn mótmælt, ásamt sumum úr Samfylkingu og sumum úr Framsókn.

Samkvæmt fréttum 24 stunda í dag eru nú í dag í Háskóla Íslands kynntar niðurstöður rannsóknar Þrastar Ólafs Sigurðssonar lektors, sem blása þessi rök út af borðinu. Samkvæmt þeim er engin fylgni milli einkavæðingarinnar og betri rekstrar, því einungis bankarnir hafa skilað betri rekstrarafkomu, en hin "gömlu" opinberu fyrirtækin ekki.

Þetta eru merkilegar niðurstöður. Í fyrsta lagi styrkja þær boðskap okkar sem höfum haft efasemdir um einkavæðingu opinberra fyrirtækja, því þessi rök frjálshyggjumanna vógu þungt, því að sjálfsögðu á að fara vel með fé. Ég held að þessar niðurstöður ýti enn frekari stoðum undir þá kröfu þingflokks Vinstri hreyfingarinnar um að nauðsynlegt sé að fara ofan í kjölinn á meintum ávinningi af einkavæðingu opinberra fyrirtækja undanfarinna ára. Fyrr enn síðar.

Konur sem segja nei. . .

2007-11-28T10:27:00.000Z

Mig langar að nota tækifærið, þótt ég bloggi heldur lítið núna í seinni tíð, til þess að benda á góða grein Drífu Snædæl í fréttablaðinu í dag. Drífa er að halda áfram að ræða um frétt sem kom í 24 stundum um daginn þar sem fram kom að feministar hefðu neitað að koma í Silfur Egils.

Í athugasemdum á hinum og þessum bloggsíðum, nánast öllum í umsjá góðkunningja Sóleyjar Tómasdóttur, sem fletta má finna í athugasemdadálkum við hennar blogg, eru athugasemdirnar þessar helstar:

Konurnar voru bara þrjár, blaðamaðurinn er í VG og fréttin þess vegna ekki frétt og Sóley ætlar aldrei að hætta þessari vitleysu (þessi seinasta er nú bara huglæg samantekt á afgangnum af innihaldinu, biðst fyrirfram afsökunar á ónákvæminni).

Davíð Oddsson, sá sami og allir telja hafa fundið upp smjörklípuaðferðina, þrátt fyrir að hann hafi kannski fyrst og fremst skilgreint hana, kemur þessu máli ekkert við. Hins vegar er þetta bara dæmi um smjörklípubeitingu há fyrrnefndum góðkunningjum að ræða ekki lengur kjarna málsins, heldur skjóta bara eitthvað út í loftið, í von um að hávaðinn yfirgnæfi umræðuna. Skotum um hver blaðamaðurinn sé og þetta sé nú meira bullið.

Ég heyrði athugasemdir Egils Helgasonar í morgunútvarpi rásar tvö í gær eða fyrradag við þessa frétt. Áferð og yfirbragð þeirra ummæla voru önnur en í frétt á mbl.is. Mér þótti vænt um yfirlýsingu Egils um að hann væri ekki bara trédrumbur, hann tæki auðvitað mark á umræðunni í þjóðfélaginu.

Ég skil ósköp vel að margir femínistar hafi ekki viljað koma í þáttinn til Egils. Egill beitir ekki femínískum efnistökum og er frekar þekktari fyrir að vera jafnvel á öndverðum meiði. En ég stend líka á því að batnandi mönnum sé best að lifa, og ég held að Egill sé í hópi þeirra.

ps:
Hitt er rétt að mikil umræða hefur verið um það að Egill Helgason sé ekki kynhlutlaus þáttur. Sú umræða hefur farið fram meðal femínista. Viðbrögð margra þeirra er að sniðganga þáttinn. Í ljósi þessa er fyrrnefnd frétt í 24 stundum "frétt".

Hvað er sameining vinstri manna?

2007-11-04T15:51:00.000Z

Reglulega er rætt við mig um hvort ekki væri nú betra ef vinstri menn væru saman í hreyfingu, saman í flokki. Ég man nú ekki hvort ég haf skrifað eitthvert smáræði um það áður, en látum það vera.

Þeir sem vilja einn stóran flokk vinstra megin við miðju eru ýmsir:
- Þeir sem hafa reynslu af því að reyna að keyra saman samfylkinguna, og líta ekki á það sem svo að það hafi mistekist á sínum tíma.
- Þeim sem finnst flottara að hafa bara hægri og vinstri (kannski Krónuna og Bónus o.s.frv.)
- Þeir sem eru á ímynduðum jaðri Samfylkingar, Framsóknar og VG og vildu stundum miklu frekar vinna með alvöru félagshyggjufólki í öllum þessum flokkum, en þola illa það sem þeir kalla bitlingasugur í framsókn, kverúlanta í VG og krata í samfó.
- Þeim sem fannst svo gaman að vera í Röskvu í Háskólanum, að það sé miklu betra að vera saman og vera á móti Vöku, því þeir séu í hinu liðinu.

Ég lít svo á að sameining ólíkra flokka geti ekki verið ákveðið, án þess að fyrir því sé frjór jarðvegur, farsæl skilyrði. Það skapar engin einn slík skilyrði.

Þess vegna hef ég ekki sérstakar áhyggjur af því að einhverjum finnst þetta spennandi og þyki miður að þetta sé ekki svona í dag.

Ég ætla að láta gott af mér leiða þar sem ég get, í flokki þar sem ég kann við mig - á meðan ég nenni. Ef allt fólk sammælist um þetta - þá er í góðu lagi að það sé hvert í sínum flokki, eða hvað?

Söguleg pólitísk tíðindi

2007-10-11T20:06:00.000Z

Í dag urðu pólitísk tíðindi.

Félagslegur meirihluti var myndaður í Reykjavíkurborg. Það eru auðvitað pólitísk tíðindi og söguleg, en það hefur gerst áður.

Það sögulega felst í því að hægri meirihluti við stjórn borgarinnar fellur. Við tekur félagslegur meirihluti.

Umskiptin voru leidd af Svandísi Svavarsdóttur oddvita vinstri grænna í borgastjórn.

Ég vil óska okkur Vinstri grænum til hamingju með þátttöku í nýjum meirihluta.
Ég óska okkur öllum líka til hamingju með Svandísi sérstaklega.

Hún er nefnilega frábær!

Egill Helgason og evran

2007-09-06T20:20:00.000Z

Egill Helgason spyr á eyjunni hvað sé vinstri eða grænt við að halda með íslensku krónunni í gegnum þykkt og þunnt. Hann gerir kröfu um annað hvort eða, evra eða króna, vinstri eða grænt. Ég er ekkert alltaf sammála Agli.

Honum fannst að þeir sem vilji halda í krónuna þurfi að rökstyðja mál sitt almennilega því við höfum heyrt rök evrusinna oft.

Það væri vel þess virði að heyra þau rök og vega og meta. Góður rökstuðningur er alltaf vel þeginn.

Egill telur upp eftirfarandi:

"1) Eða er ekki ljóst að krónan er farin að valda íslenskum almenningi þungum búsifjum – bæði fólk og fyrirtæki eru á hröðum flótta undan henni? "

- Ég vil gjarna heyra betur hvað átt er við. Hvernig flýja Íslensk fyrirtæki krónuna? Er átt við fyrirtækið Straum - Burðarás og önnur fyrirtæki sem gera upp ársreikninga í evrum? Er það flótti? Hvernig flýr fólk krónuna?

- Hvað batnaði hjá fyrirtækjum og fólki við að taka upp evru?

"2) Sum fyrirtæki hafa reyndar þann hag af krónunni að þau þurfa ekki að óttast erlenda samkeppni meðan krónan er í notkun."

- Hvaða fyrirtæki og af hverju?

- Hvaða erlenda samkeppni kemur inn á íslenska markaðinn ef við tökum upp evru?

3) Fólk tekur lán í jenum, svissneskum frönkum og evrum með tilheyrandi gengisáhættu – bankar á Íslandi lána fé í sérstökum gjaldmiðli, hinni verðtryggðu krónu. Allt er talið brúklegt – nema krónan.
- Samt er enn verið að nota krónuna. Væri ástandið betra ef hún væri ekki? Hvað myndi breytast?

"4) Ber það þá ekki helst vott um harða þjóðernishyggju að vilja halda í krónuna?"
- Á móti má spyrja, ber það ekki vott um harða ósjálfstæðisþörf að vilja endilega vera í myntbandalagi evru?

5) Samt er erfitt að halda því fram að notkun hennar sé mikið sjálfstæðismál fyrir þjóðina. Gengi krónunnar ræðst ekki síst af því sem gerist á fjármálamörkuðum úti í heimi. Við ráðum minnst um það sjálf. Við erum í sjálfheldu hárra vaxta sem eru hvergi hærri í veröldinni, stýrivextirnir hafa hækkað átján sinnum undanfarin ár en skila samt ekki tilætluðum árangri.

- Þetta er hárrétt. Stýrivextir stýra engu lengur. Þeir gefa til kynna vilja íslenska Seðlabankans, en hagfræðilegur kraftur þeirra, afl sem stjórntæki er ekkert lengur. Rök fyrir því að vilja halda í krónuna sem hagstjórnartæki halda því illa.

Það er ekkert vinstri eða grænt, eða vinstrigrænt að vilja halda í krónu, eða vilja ekki taka upp evru. Ekki í mínum huga.

Hvaða rök mæla þá með upptöku evrunnar?

Sönnunarbyrðin er ennþá evrusinnamegin.

Egill Helgason, það er augljóst!

2007-09-04T16:22:00.001Z

Ég sá að einn af bloggurum eyjunnar, Egill Helgason, heldur því fram að sönnunarbyrðin hafi snúist við, nú þurfi þeir sem vilji halda í krónuna þurfi að svara fyrir það.

Ég sá að hann telur það augljóst að þetta sé svona.

E.t.v. telur Egill líka augljóst að sönnunarbyrðin hafi líka augljóslega snúist við þegar komi að hugmyndum um einkavæðingu almannaþjónustunnar?

Ég tel alla vega að ég hafi alla jafna rétt fyrir mér og þeir sem hafi aðra skoðun rangt.

Það er augljóst!

Hvað er ráðherraábyrgð?

2007-08-27T13:41:00.000Z

Á RÚV var haft eftir Sturlu Böðvarssyni að hans aðkoma að málinu hefði ekki leitt til þess umframkostnaðar sem nú væri til rannsóknar. Þess vegna sé fráleitt að hann segi af sér.

Ber hann þá ekki ábyrgð á málinu? Bera ráðherrar eingöngu ábyrgð á málum sem eru í beinu orsakasamhengi við aðgerðir þeirra? Er til dæmis engin ábyrgð borin sitji ráðherrar hjá og hlutirnir verða án aðkomu ráðherra - bera þeir ekki ábyrgð?

Ef Þjórsá verður virkjuð, og umhverfisráðherra kysi að gera ekkert, ber hún þá enga ábyrgð, því ekkert sem hún gerði var til þess að virkjunin varð að raunveruleika.

Þetta vekur upp stef sem má til dæmis sjá á heimasíðu Katrínar Jakobsdóttur um óvirka umhverfisstefnu (http://www.katrinjakobsdottir.is/wordpress/?p=112).

Þannig má spyrja sig, bera ráðherrar bara ábyrgð á því sem þeir gera sjálfir, en alls ekki því sem ekki er gert eða það sem aðrir gera?

Indland opnar sendiráð á Íslandi

2007-08-10T09:27:00.000Z

Indland hefur fyrirætlanir um að starfrækja sendiráð á Íslandi á þessu fjárhagsári. Forsætisráðherra Indlands segr megintilganginn m.a. vera að gæta að pólitískum og efnahagslegum hagsmunum Indlands. Þetta segir netblaðið "The Hindu". Þetta þýðir að sendiráðið í Noregi mun ekki lengur sinna þessu hlutverki.

Íslenska sendiráðið á Indlandi hóf starfsemina í lok febrúar árið 2006. Nú sér grilla í Indverskt sendiráð hér á landi, og er það vel.

Það er ekki óalgengt stef hjá fólki að andmæla sendiráðum Íslendinga vegna þess að það sé fáránlegt að setja fé í erlend sendiráð á meðan ekki sé hægt að sinna verkefnum heima fyrir.

Ég er ósammála þessum röksemdum. Við skulum muna að flest stöðugildi utanríkisþjónustunnar eru hér á Íslandi. Um utanríkisþjónustuna gildir, eins og annan rekstur, að það er nauðsynlegt að gæta að hagkvæmni í rekstri. Þess vegna væri nær að benda á slíka meinbugi, en býsnast ekki yfir stofnunum okkar sem eiga að gæta að hagsmunum Íslendinga víðs vegar um heiminn.

(Myndin er frá sendráði okkar Íslendinga á Indlandi og er tekin af heimasíðu Utanríkisráðuneytisins.)

Formaður fjárlaganefndar enn að snapa fæting

2007-08-09T09:53:00.001Z

Flestir muna hvernig Gunnar Svavarsson og Árni Mathiesen voru að ybba sig hvor við annan á dögunum þegar þeir lýstu yfir andstæðum skoðunum um hvort sveitarfélög skyldu njóta hluta fjármagnstekjuskatts.

Nú er Gunnar kominn á kreik að nýju að sparka í Sjálfstæðisflokkinn. Nú hefur samkeppniseftirlitið nefnt rannsókn, kaupi Reykjavíkurborg hlut Hafnarfjarðar í Hitaveitu Suðurnesja. Í Blaðinu í dag er haft eftir Gunnari fírugum að enginn fyrirvari sé um álit samkeppnisstofnunar í samkomulaginu milli Hafnarfjarðar og Reykjavíkur, þess vegna verði Reykjavík bara að selja einhverjum öðrum sinn hlut á sama gengi, Hafnarfjörður muni að sjálfsögðu selja og Reykjavík kaupa, enda er um það samkomulag.

Þarna er Gunnar að gera margt:

Sparka í íhaldið

Gefa í skyn: "Ég plataði Reykjavík"

Minna á: "Prinsippið um orkufyrirtæki í almannaeigu er ekki mitt, og það kemur mér ekki við."

Ekkert af þessu kemur mér á óvart miðað við kynni mín af Gunnari. Þetta er í fullu samræmi við hvernig hann metur hlutina.

(myndin er tekin af heimasíðu Gunnars:www.gunnarsavarsson.is)

Lettneskur, danskur og bandarískur her á Íslandi

2007-08-08T08:35:00.000Z

Í vikunni koma hingað hermenn frá Danmörku, Lettlandi og Bandaríkjunum. Þeir segjast vera að æfa sig í að verja landið. F-16 herþoturnar norsku koma á sama tíma.

Hvað eru útgjöld Íslendinga til hermála há? Hafa þau verið rædd á Alþingi?

Harry Potter stelpa?

2007-08-06T22:12:00.000Z

Stórgóð vinkona mín Sóley Tómasdóttir skrifar stutta hugleiðingu um Harry Potter. Að vanda er brugðið upp kynjagleraugunum við skoðunina. Sóley skrifar:

Að Harry Potter loknum

Þá er ég búin með Harry. Dálítið skrýtið að eiga ekkert eftir þar. Skemmtilegar bækur sem hafa gefið lífinu lit með reglulegu millibili undanfarin ár. Segi svo sem ekki að endalokin hafi komið mikið á óvart en engu að síður gott að vita hver þau eru.Eitt sem ég velti fyrir mér. Ætli það hafi verið meðvituð ákvörðun hjá J.K. Rowling að hafa Harry Potter strák, eða ætli hann hafi verið strákur þegar hugmyndin fæddist? -Það er athyglisvert að spá svolítið í hvoru fyrir sig.

Hafi Rowling þurft að gera upp við sig hvort bækurnar ættu að fjalla um galdrastelpu eða galdrastrák var það eflaust klókt að velja strákinn. Þó ég geti ekki fullyrt um það, er óneitanlega líklegra að karlkyns hetja selji betur en venkyns. Þó tel ég líklegra að Harry hafi fæðst sem strákur í hausnum á Rowling.

Samfélagið hefur kennt okkur að hetjur eru karlkyns og því er erfitt - jafnvel fyrir jafnsnjallar konur og Rowling - að láta sér detta kvenkynsofurhetjur í hug.

"Samfélagið hefur kennt okkur að hetjur séu karlkyns. . ."
Jú örugglega að einhverju leyti. Það sem er samt merkilegt við Harry Potter hetjurnar er það að söguhetjurnar eru svolítið langt frá staðalímyndunum. Harry er með gleraugu, Hermione er gáfuð og klár, Ron er rauðhærður. . .

Eru þetta ekki allt hetjur sem eru langt frá því að vera staðlaðar?

Og þegar allt kemur til alls, galdranornir eru staðlaðri en galdradrengir. Þess vegna væri það algerlaga úr fasa að hafa titilsöguhetjuna sem stelpu. Því það hefði jú verið dæmigert.

Ágreiningur fjármálaráðherra og formanns fjárlaganefndar

2007-08-03T00:12:00.000Z

Er þetta ekki rangt hjá Grími Atlasyni bæjarstjóra í Bolungarvík um skilningsleysi fjármálaráðherra á aðstæðum sveitarfélaganna: http://www.bb.is/Pages/26?NewsID=103951. Við skulum muna að stjórnarsáttmáli hægristjórnarinnar kveður á um að ". . .Tekju- og verkaskipting ríkis og sveitarfélaga verði endurskoðuð með það að markmiði að efla sveitarstjórnarstigið".

Hljóta ekki að vera einhverjar aðrar tekjur sem fjármálaráðherrann hefur í huga? Varla eru stjórnarsáttmálinn bara orð á blaði!?

En hvernig mun fjárlagagerðin annars ganga þegar sundrungin er þessi milli ráðherra og formanns fjárlaganefndar?

Egill Helgason í vindbelgsstuði

2007-08-01T18:17:00.000Z

Össur Skarphéðinsson og Egill Helgason eiga sumt sameiginlegt. Þeir eru t.d. hvorugir sérlega grannir og þykir fátt jafn skemmtilegt og að hlusta á sig sjálfan og eigin kenningar.

Enn einu sinn sést hversu náið nefið er eyrunum, því einn af pistlum Egils Helgasonar í dag er slándi líkur pistli Össurar frá fimmtudeginum 21. júní. Báðir eiga þeir alveg greinilega greiðan aðgang að húgsun og hjarta hins almenna flokksmanns í VG: http://ossur.hexia.net/roller/page/ossur/Weblog/svandis_og_steingrimur.

Ég hef eina spurningu og má spyrja sig hvert eftirtalinna svara séu rétt:

a) Ætli sjálfið sé eitt og hið sama?
b) Er hvor heimild hins um strauma og stefnur Vinstri grænna?
c) Allt ofantalið?

Tekjur mínar 2006 eru. . .

2007-07-31T14:42:00.000Z

. . .opinberar.

Skv. skv. álagningarskrá greiði ég í skatta vegna 2006:
kr. 2.207.498,-

p.s. sendið endilega mail á sus@xd.is og segið þeim að þið hafið séð þetta.

Tekjur mínar. . .

2007-07-31T11:47:00.000Z

. . .á seinasta ári verða birtar á bloggi þessu þegar álagningarseðlarnir berast.

Um Vesturland að hluta.

2007-07-30T17:44:00.000Z

Nú lítur allt út eins og ég hafi verið í París í fleiri daga. Svo var ekki.

Ég kom heim fyrir þó nokkru, en hef verið á faraldsfæti síðan. Fór austur að Kirkjubæjarklaustri og vestur að Reykhólum.

Viðkoma var víða. Ég nefni Selsskóg í Skorradal, Húsafell, Fossatún (sem ætti kannski bara að heita SteinarsBerg), Hólasel, Logaland, Kleppjárnsreyki, Kjalvararstaði.

Keyrði um Borgarfjörð, Skarð- og Fellsströnd.

Prófaði bæði tjaldið mitt sem við höfum átt um skeið, og leigðan tjaldvagn.

Frábært þetta land.

God tur til Paris

2007-07-10T12:48:00.000Z

- Eða var það ekki svo sem kona Arne Treholt, Kari Storækre nefndi bók sína forðum??

En nú fer ég til Parísar. Ástandið á Íslandi er svona:

Það má nauðga konum, svo framarlega sem þær sýna ekki viðnám. Eða, það verður að vera viðnám sem er brotið á bak aftur til að um nauðgun sé að ræða.
Það á áfram að virkja Þjórsána, því enn vantar orku fyrir ál.
Sitjandi ríkisstjórn vill einkavæða orkugeirann, það er í stjórnarsáttmálanum. Samt er það verra fyrir almenning.
Mælikvarðar Íslands eru hagnaður og gróði. Aðrir kvarðar eru ómerkilegir
Ríkisstjórninni finnst ekki nauðsynlegt að kalla saman þing til þess að veita undanþágu frá almennum öryggisákvæðum, heldur setur bráðabirgðalög.
Óvirk umhverfisstefna, eins og Katrín Jakobsdóttir skilgreinir hana, er stefna ríkisstjórnarinnar. Skerðum ekki frelsi hagnaðins og gróðans.
Lægri virðisauki fór til verslunarinnar - ekki til neytenda. Það þýðir að svokallaðar kjarabætur aff völdum þessa urðu engar, kaupmáttaraukningin var loft.
Ríkisstjórnin veittist að þeim sem lágar hafa tekjurnar með lækkun hámarkslána íbúðalánasjóðs. Félagsmálaráðherra er Jóhanna Sigurðardóttir.

Ætli þetta hafi breyst þegar ég kem til baka?

Hvernig hagar systurflokkur VG í Noregi sér?

2007-07-03T23:41:00.000Z

Í norska blaðinu Aftenposten er viðtal við Kristínu Halvorsen (http://www.aftenposten.no/nyheter/iriks/politikk/article1863568.ece), formann SV, systurflokks VG. Þar ræðir hún framtíðina og veruna í ríkisstjórn, en Kristín er fjármálaráðherra.

Það er merkilegt að heyra hvernig fjármálaráðuneytinu er beitt í þágu umhverfismála. Kristín leggur áherslu á þrjá þætti í komandi framtíð:

- losun mengandi þátta. Í Noregi eru það samgöngur sem losa mest. Mengun frá bílaumferð og flugumferð skal fara lækkandi.

- langtímamarkmið snúast um að breyta hegðun Norðmanna og fá þá til þess að nota annars konar eldsneyti með lægra CO2.

Til þess að ná þessum markmiðum eru lögð frekari gjöld á vegi og vegtolla og aukin áhersla lögð á almenningssamgöngur í bæjunum, með auknum beinum fjárframlögum. Síðan verður haldið áfram við endurbætur á járnbrautinni, uppbyggingaráformum er flýtt og aukin kraftur verður lagður í heildarsamgöngur á stóroslóarsvæðinu.

Þriðja markmiðið er:
- beita gjöldum til þess að breyta hegðun fólks

Lækka gjöld á þau ökutæki sem nota umhverfisvænna eldsneyti og auka útgjöld á önnur. Í heildina verður um jafnar tekjur að ræða, þannig að tekurnar eru færðar á þá sem menga meira. Einnig hefur ríkisstjórnin það markmið að taka sjálf upp umhverfisvænni bílaflota.

Já, þannig er hægt að stýra umhverfismálum úr fjármálaráðuneyti

Hitaveita Suðurnesja: Gróðafyrirtæki eða almannaþjónusta?

2007-07-01T23:22:00.000Z

Ályktun stjórnar VG í Hafnarfirði frá því dag er góð:

Stjórn Vinstri grænna í Hafnarfirði lýsir fullri ábyrgð á ríkisstjórninni að
hafa hrundið af stað þeirri atburðarás sem nú er komin af stað í
einkavæðingarferli Hitaveitu Suðurnesja. Jafnframt skorar stjórn VG í
Hafnarfirði á ríkisstjórnina að reyna að endurheimta sinn hlut í
fyrirtækinu, eða tryggja með öðrum hætti að aðilar sem hyggjast tryggja sér
orkuréttindi til þess að geta nýtt þau í þágu eigin fyrirtækja eða tengdra
fyrirtækja, til dæmis með því að selja orkuna til mengandi stjóriðjufyrirtækja.
Það er stefna Vinstri grænna að veitustofnanir skulu vera í almannaeigu,
enda ber þeim fyrst og fremst að þjóna almenningi og tryggja að allir hafi
aðgengi að þeirri grunnþjónustu sem fyrirtækið býður, en verða ekki ofurseldar
gróðahagsmunum. Einkavæðing veitufyrirtækja bitnar fyrst og fremst á neytendum,
sem munu greiða fyrir hækkað markaðsverð orkufyrirtækja með hærri gjöldum fyrir þjónustuna.
Stjórn Vinstri grænna í Hafnarfirði lýsir yfir fullum stuðningi
við yfirlýsingar fulltrúa Hafnarfjarðar í Hitaveitu Suðurnesja í fjölmiðlum um
að Hafnarfjörður neyti forkaupsréttar síns í fyrirtækinu. Stjórn VG í
Hafnarfirði leggur áherslu á að varðveita meginmarkmið um almannahagsmuni og um að gæta að hag neytenda.

Það eru slegnir varnaglar hjá Ögmundi Jónassyni í pistli á heimasíðu hans:
http://ogmundur.is/news.asp?id=658&news_ID=3368&type=one

Hér bendir Ögmundur á að forsendur Gunnars Svavarssonar kunna að vera ólíkar þeim sem við í VG höfum fyrir því að halda eignarhlut HS hjá Hafnarfirði. Er það svo? Er Gunnar Savarsson að hugsa um fjárfestingarkosti? Hvað um almannahagsmuni?

Það verður auðvitað athuglisvert að sjá niðurstöðuna af öllu ævintýrinu. Munum líka að Gunnar er líka formaður fjárlaganefndar í ríkisstjórn þar sem Árni Mathiesen er fjármálaráðherra. Maðurinn sem skrifaði undir samninginn við Geysi Green Energy um hlut ríkisins í HS.

Ætli þeim sé vel til vina?

Ástandsmat í V-Evrópu ekki til sýnis hjá CIA

2007-06-27T01:14:00.000Z

Var að skoða FOIA skýrslurnar. Athyglisvert að stundum er aðeins hluti skýrslunnar skannaður inn. T.d. er ekki ástæða til, að mati vina okkar í vestrinu, að sýna hvaða augum þeir litu ástandið í vestur-evrópu á þessum tíma.
Sjá hér: http://www.foia.cia.gov/browse_docs.asp?doc_no=0000969725&title=WORLD+TRENDS+AND+DEVELOPMENTS&abstract=&no_pages=0069&pub_date=2/1/1977&release_date=8/19/2003&keywords=SOVIET+FOREIGN+RELATIONS+ANALY&case_no=CSI-2001-00027©right=0&release_dec=RIPPUB&classification=U&showPage=0001

Hvers vegna?

Er breytingin núna?

2007-06-20T09:36:00.000Z

Það má velta því fyrir sér hvað hefur áunnist í kvenfrelsisbaráttunni. Ef við veljum tímabilið frá því að tímamótaplatan Áfram stelpur kom út, og svo 19. júní 2007, þá hefur auðvitað töluvert áunnist. Um leið er gríðarlega mikið eftir.

Það má alveg nefna ýmsar vörður, sem eru mismerkilegar og ræður þar bæði smekkur og fleira. Forseti Íslands varð Vigdís Finnbogadóttir, Femínistafélagið varð til, Kvennalistinn o.fl. o.fl.

Sumstaðar má greina afturför, svo sem í ráðherraskipan Geirs Haarde, hann veitir forsæti ríkisstjórn sem var sett saman 2007 sem hefur aðeins þriðung ráðherra sem eru konur.

Mér sjálfum finnst meginframförin felast i því að það er eðlilegt í dag fyrir unga karlmenn að finnast að kynin eigi að hafa sömu stöðu og sama rétt, hitt sé óeðlilegt ástand. Það er líka sýn fleiri og fleiri ungra karla, að líta ekki á þetta ójafnvægi sem sérstakt baráttumál kvenna, heldur sem samfélagsmein.

Liltu verður vöggur feginn, hugsa margir núna. Jú, en munum samt að sértækar aðgerðir sem taka á einkenunum eru til skamms tíma - en hluti af jarðvegsbreytingum er til dæmis þegar fólk horfir öðruvísi á hlutina - og sér þá í nýju ljósi.

Skólagjöld í Háskóla Íslands

2007-06-14T11:33:00.000Z

Skýrsla Ríkisendurskoðunar um Háskóla Íslands er góð og innihaldsrík. Meginniðurstaðan er þessi:

Mikilvægt er að stjórnvöld menntamála taki skýrari afstöðu til þess en hingað
til hvernig verja á kennsluframlögum til háskóla og taki þá m.a. mið af
þjóðhagslegri hagkvæmni námsgreina og æskilegri dreifingu kennslu milli skóla.
Einnig þarf að finna leiðir til að draga úr brottfalli nemenda ríkisrekinna
háskóla. Þá þurfa stjórnvöld að setja lágmarkskröfur um menntunarstig
háskólakennara og rannsóknarvirkni.

Þetta er gott. Það er hins vegar óheppilegt að Ríkisendurskoðun sé sérstaklega að fjalla um að skólagjöld valdi því að brottfall minnki. Þetta er órökrétt ályktun.

Það er svo að þau sem hefja nám í H.Í. eru oft leitandi, rannsakandi. Fara kannski úr einu námi í annað. Leita. Það er gott fyrir þjóðfélagið og sýnir að möguleikar eru á að leit út fyrir kassann, út fyrr normið. Þau sem fara í viðskiptafræði eða lögfræði á Bifröst, eða H.R. hafa gert upp hug sinn um námsleið. Einnig set ég spurningamerki við það að skilvirkni sé mæld með þessum hætti.

Er best að klára akademískt verkefni á sem stystum tíma? Eykur það gæði námsins? Eru námsritgerðir sem fólk er fljótt að klára betri en þær sem taka lengri tíma?

Nálgunin er röng og leitt að þetta skuli vera meginfréttapunktur þessarar annars ágætu úttektar.

Á þing er sest Auður Lilja

2007-06-12T12:25:00.001Z

Þá erum við í VG inni með þrjá varaþingmenn, því í hópinn bættist Auður Lilja Erlingsdóttir, stórgóð vinkona og frábær félagi.

Samfylkingin sleit Reykjavíkurlistanum

2007-06-10T18:47:00.000Z

Fyrir mína parta er það langþráð viðtalið við Svandísi Svavarsdóttur í Morgunblaðinu í dag, málið svo sem mér í skylt í mörgum skilningi þess. Það er löngu tímabært að þessi saga verði sögð - eftirspurnin er næg og nóg um frásagnir þar sem réttu máli er hallað, ekki síst af ráðherra iðnaðarmála.

Var annars í grímsnesinu í góðu yfirlæti með tengdafjölskyldu. Spil, humar á Stokkseyri, heilsað upp á Urriðafoss og fleira.

Álbræðsla var það heillin!

2007-06-08T09:26:00.000Z

Fylgjendur stækkunar álvers í Straumsvík, svo og fylgjendur stóriðjustefnunnar, neru okkur í Sól í straumi, og reyndar okkur í VG líka því um nasir að nota rangnefni.
Þess vegna vil ég benda á þetta:
http://www.althingi.is/altext/134/s/0017.html

Umhverfisstefna Samfylkingarinnar á þingi sú sama og í Hafnarfirði

2007-06-07T11:37:00.000Z

Það er merkilegt að á þingi ætlar Samfylkingin nú ætla að leika sama leikinn og í Hafnarfirði. Vera umhverfisvænn flokkur, en þær ákvarðanir sem hafa verið teknar verða bara teknar áfram.

Í umræðum í morgun kom það berlega í ljós.

Er forsætisráðherra Sjálfstæðisflokks enn á móti? - Um Palestínu

2007-06-07T09:31:00.000Z

Vilja viðurkenna Palestínustjórn
Belgía, AP Vaxandi fjöldi þingmanna Evrópuþingsins krefst þess að Evrópusambandið viðurkenni þjóðstjórn Fatah og Hamas hreyfinganna í Palestínu og endurvekji fjárhagslegan stuðnin
Belgía, AP Vaxandi fjöldi þingmanna Evrópuþingsins krefst þess að Evrópusambandið viðurkenni þjóðstjórn Fatah og Hamas hreyfinganna í Palestínu og endurvekji fjárhagslegan stuðning við landið, sem lokað var á fyrir ári í kjölfar kosninganna.
Um þriðjungur þingmanna vill róttækar breytingar á stefnunni, en þeir telja efnahagsþvinganir ýta undir átök í landinu í stað þess að stöðva þau.
"Eina leiðin er að viðurkenna stjórnina sem var lýðræðislega kjörin og tala við alla meðlimi hennar," sagði belgísk þingkona, Veronique De Keyser. - sgj

Þetta er lítil frétt úr Fréttablaði dagsins í dag. Það má vel skoða þetta í samhengi við þingsályktunartillögu sem flutt var af nokkrum þingmönnum VG:

Alþingi ályktar að fela ríkisstjórninni að viðurkenna réttkjörna ríkisstjórn á heimastjórnarsvæði Palestínu og taka upp við hana eðlileg samskipti. Jafnframt beiti hún sér á alþjóðavettvangi fyrir því að önnur ríki geri slíkt hið sama.

Í umræðum á þingi benti Bjarni Harðarson þingmaður framsóknarmanna réttilega á að um þetta mál hefði oft ríkt nokkur samstaða. Í því samhengi vil ég minna á yfirlýsingar forsætisráðherra í fjölmiðlum fyrir kosningar, þar sem hann var heldur fráhverfur þessari tillögu. Því verður fróðlegt að sjá hvernig hann greiðir henni atkvæði nú, ef hún fer lengra á þinginu.

Eins og Michael Jackson sé kominn!

2007-06-04T17:31:00.000Z

Um helgina var farið í mikla frægðarför til nokkurra merkisbæja á Ströndum þar sem fremst skal Litla-Fjarðarhorn nefnt, gist á Kirkjubóli, heimsóttir fleiri merkisstaðir og söfn en fremst þar er sennilega Sauðfjársetrið (http://www.strandir.is/saudfjarsetur/).

Þar hittum við fyrir Arnar S. Jónsson frá Steinadal framkvæmdastjóra og auðvitað svo miklu miklu fleiri. Hann hins vegar lét þessi frábæru orð falla hér í fyrirsögninni þegar hann ræddi um heimsókn okkar í safnið.

Því þannig var að okkur var tekið, þar sem við komum til heimafólks, eins og þjóðhöfðingi væri á ferð. Enda var það svo.

Þjóðhöfðinginn var jú nefnilega höfuðsnillingurinn Benedikt K. Franklínsson frá Litla-Fjarðarhorni, sem sést á myndinni hér að ofan ásamt eiginkonu sinni Regínu Guðmundsdóttur frá Flatey.

Þau eru þjóðhöfðingjar bæði tvö, í þeim ættbálki sem ég er hluti af ásamt svo miklu fleirum.

Ef ég kynni að semja um þau gott kvæði, þá gerði ég það. En í stað þess þá lýt ég höfði. Og þakka.

Glæsilegar þingkonur í sjórnarandstöðu

2007-05-31T22:42:00.001Z

Ég horfði á umræður um stefnuræðu á þingi í kvöld. Náði reyndar ekki inn fyrr en rétt fyrir ræðu Katrínar og hætti rétt eftir ræðu Guðfríðar Lilju.

Mér fannst ræðurnar hjá þeim skörulegar og hæfa vel flokknum sem leiðir stjórnarandstöðuna.

Hvalveiðarnar líka - skyldleiki við framsóknarmenn

2007-05-29T21:47:00.000Z

Jú, það passaði til. Hvalveiðar eru ásteitingsefni þessarar ríkisstjórnar. Þó greinilega ekki meira en svo að til dæmis hér í Hafnarfirði sá fulltrúi Sjálfstæðisflokksins í umhverfisnefnd sérstaka ástæðu til þess að fagna því að hvalveiðar væru hafnar á ný. Tveir fulltrúar Samfylkingarinnar sáu enga sérstaka ástæðu til þess að bóka sérstaklega í því máli. Ekki þá.

----------------------
Hér upphefst nýr þáttur um skyldleika undirritaðs og nokkurra íslenskra þingflokka. Byrjað á framsóknarflokknum.

Ég er jafnskyldur öllum þingmönnum framsóknar í NA-kjördæmi. Sameiginlegur ái okkar Valgerðar er Jón Einarsson bóndi í Reykjahlíð í Mývatnssveit. Hins vegar eru forfeður mínir og piltanna með Valgerði, Birkis og Höskuldar, þau Sigurður "blindi" Sigurðsson og Guðrún Jónsdóttir.

Sigurður var niðursetningur mestan part af lífí sínu. Velferðarkerfið var þá ekki upp á marga fiska.

Bjarni Harðarson er hins vegar minnst skyldur mér af þingmönnum framsóknar. Halldór Eirísson prestur og skáld á Kolfreyjustað í Fáskrúðsfirði og á Hjaltastað í útmannsveit, en þar átti hann einnig prestfrúna Þorbjörgu Hallgrímsdóttur.

Við Bjarni erum lítið skyldir.

Þórunn stendur á sínu

2007-05-26T15:01:00.001Z

Einstaklingar innan þessarar stjórnar standa margir hverjir í lappirnar. Þórunn útilokar Norðlingaölduveitu, og er það vel. Það er eflaust ekki auðvelt að standa í þessu innan flokksins, enn er talsvert um þá sem þykir vænt um stóriðjustefnuna.

Nú er spurning hvort ráðherrar samfylkingarinnar ætla fleiri að ganga á móti yfirlýsingum Sjálfstæðisflokksins?

En nú er vor. . .

Þjórsárver eftirgjöf Þórunnar?

2007-05-25T09:31:00.000Z

Það er magnað hvernig yfirlýsingar oddvitanna í ríkisstjórninni lýsa ágreiningnum.
http://mbl.is/mm/frettir/innlent/frett.html?nid=1271327

Ætli það sé þetta sem Þórunn átti við um málamiðlun?

Ætli Dofri Hermannsson viti af þessu?

Náði Þórunn samkomulagi við Össur?

2007-05-22T22:56:00.000Z

Ég tók eftir ummælum nýs umhverfisráðherra um að hún væri mjög sátt við það samkomulag
sem flokkarnir hefðu náð í stóriðju- og umhverfismálum en að sjálfsögðu hefði þurft að ná fram málamiðlunum þar.

Af hverju var það svo? Hvar stendur iðnaðarráðherra gagnvart slíku samkomulagi? Er það ekki Össur Skarphéðinsson, sem rétti upp hönd með virkjun Kárahnjúka?

Þingvellir - salt í sár framsóknar

2007-05-19T22:39:00.000Z

Það er nú líkt því að nudda salti í sár framsóknar að hafa stjórnarmyndun á Þingvöllum.

Er það ekki?

Góður andi - en hvar eru Ágúst Ólafur og Arnbjörg?

2007-05-18T16:31:00.000Z

Það er góður andi milli Ingibjargar Sólrúnar, Össurar, Geir og Þorgerðar. (Sjá hér: http://www.mbl.is/mm/frettir/frett.html?nid=1270217)

En hvar eru þau Arnbjörg og Ólafur Ágúst? Eru þau gleðispillar?

Stjórnarsáttmálinn

2007-05-18T13:28:00.000Z

Það verður spennandi að sjá hvernig stjórnarsáttmálinn verður, hvað verður sett á oddinn.

Vonandi verður tekið á málum vestfirðinga. Þar hefur verið fækkun starfa undanfarið og endar með ósköpum ef fer sem horfir. Það skiptir máli að fólk týni sér ekki í hagræðingarmælikvörðunum og sleppi kjálkanum alveg.

Ég ætla að spá því fyrirfram að gjaldtaka í heilbrigðiskerfinu muni aukast nokkuð á næstunni. Við munum sjá skýrari merki um tvöfalt heilbrigðiskerfi.

Bilið milli þeirra ríku og þeirra fátækara mun áfram aukast. Á sama tíma verður velferðarnetið bætt með ölmusum, í stað þess að það verði fyrir alla í samfélaginu.

Það er mikilvægt fyrir Samfylkingu að taka skrefið eins langt til vinstri og hugsast getur, því með tímanum tosast hún til hægri. Sjálfstæðiflokkurinn þarf að sama skapi að koma sér fyrir til hægri, því þeir tosast til vinstri með tímanum.

Frjálshyggjan verður sterk í þessari stjórn og skilar ávinningi til skamms tíma. Þessi ríkisstjórn verður trúlega nokkuð áþekk þeirri fyrri að mörgu leyti. Frelsi markaðarins verður aukið en frekar og frelsi einstaklingsins mun láta undan.

-----------------------------------
Við verðum að spyrja okkur um þessa nýju stjórn:
Velferð með hvaða formerkjum?
Umhverfisvernd, með hvaða formerkjum?
Kvenfrelsi, með hvaða formerkjum?

Utanríkismál? Her? Írak?
Þensla? Óðaverðbólga?

En spyrjum að leikslokum - allir skulu njóta efans.

Stjórn Suðvesturhornsins

2007-05-17T17:35:00.000Z

Það er margt sem bendir til þess að stjórn Samfylkingarinnar og Sjálfstæðisflokksins verði stjórn suðvestursins, síður stjórn landsbyggðarinnar.

Það er brýnt fyrir náttúru landsins að umhverfisstefnan Fagra ísland fái að njóta sín, ekki álstefna Gunnars Svavarssonar, Smára Geirssonar og Kristjáns Möllers. Hverjir innan þingflokks Samfylkingarinnar tala fyrir því?

Það er líka nauðsynlegt fyrir íslenskan landbúnað að sú aðför að bændum sem var boðuð af Samfylkingunni á Suðvesturhorninu verði undir landbúnaðarstefnu þeirra á landsbyggðinni. Hverjir innan þingflokks Samfylkingarinnar tala fyrir því?

Einu getur þessi samstjórn illa varist svona, ef hún verður til. Það er frekari einkavæðingu innan almannaþjónustunnar. Þar er styttra á milli framsóknar og vinstri grænna.

En það er ekki víst að þessi stjórn verði til - þótt það sé líklegt.

Munum samt að áhyggjur af því hvar þurfi að gefa eftir eru minni - ef við myndum vinstri stjórn.

Og munum líka, kæru Samfylkingarfemínistar, að þannig gæti Ingibjörg Sólrún jú orðið fyrsti forsætisráðherra Íslands sem er kona.

Allt annað líf

2007-05-16T21:15:00.000Z

Jæja, að loknum kosningum, hvað gerir frambjóðandi þriðja sætisins þá?
Jú hann snýr sér aftur að hinu daglega amstri i bili - að sínu fasta starfi í hugbúnaðarbransanum, að því að vera með fjölskyldunni meira, undirbúa sumarfrí, og svoleiðis.

Stjórnarmyndunarsamtöl B og D standa yfir. Þær eru greinilega vandkvæðum bundnar, fyrst þeim er ekki lokið.

Ég er sammála fulllyrðingum Ögmundar um stjórnarmynstur, um valkostina sem eru í boði (sjá: http://www.ogmundur.is/news.asp?id=657&news_ID=3287&type=one).

Ég get líka sagt við þá sem vilja alls ekki þessa stjórnina eða hina, til hægri eða vinstri, samstarf við þennan eða hinn: það er mikilvægast að gera gagn. Þá á ég ekki við flokkana sem viðkomandi er í heldur samfélagið allt, þjóðina.

Ég bauð mig fram í þriðja sæti V listans til þess að gera þjóðinni gagn.

Til þess eru stjórnmálamenn.

Að kosningum loknum

2007-05-14T11:48:00.000Z

Það er við hæfi að þakka öllum þeim sem lögðu hönd á plóg í þessari rússíbanareið að bjóða fram VG lista í SV kjördæmi.

Ég þakka líka kjósendum og fagna því að hafa náð þeim árangri sem við náðum.

Undanfarið hef ég varið miklu af tíma mínum með höfðusnillingnum Guðfríði lilju Grétarsdótur, Ögmundi Jónassyni, Andreu Ólafsdóttur og Mireyu Samper.

Ég þakka þeim öllum fyrir, ekki síst þeim sem ég minnstist ekki á.

Takk fyrir okkur, og sjáumst í baráttunni - áfram!

Í dag er dagur til að kjósa

2007-05-12T10:31:00.000Z

Ég er að skella mér niður í Gúttó hér í Hafnarfirði, skjótast svo með ömmu á kjörstað, kíkja svo inn í Kópavoginn í Hamraborg 1-3, í Kragakaffi. Svo verð ég bara á randi um kjördæmið.

Stuð - stuð - stuð.

Síðan Súlnasalurinn í kvöld.

Barátturæða Ögmundar Jónassonar

2007-05-10T19:11:00.000Z

Ég vil vekja athygli á barátturæðu Ögmundar Jónassonar:

Það er auðvelt og það er gott að vera vinstri græn. Ég held að þjóðin sé nær öll með okkur. Ég held að innst inni vilji allir hafa flokk sem passar upp á náttúruna og umhverfið. Ég held að innst inni vilji enginn að í þjóðfélaginu sé fátækt fólk og ég held að innst inni vilji allir að við séum öll á sama bátnum, að á Íslandi ríki jöfnuður og réttlæti.

Sjá nánar hér: http://www.ogmundur.is/news.asp?id=657&news_ID=3270&type=one

Heiðarleg kosningaloforð!

2007-05-07T23:05:00.000Z

"Ég get lofað ykkur því að þátturinn verður mjög afslappaður og lærdómsríkur og engin flókin og furðuleg orð sem þyrfti 18 ára menntun frá Yale í sameindahagfræði til þess að skilja, verða notuð."

Stöndum við Vinstri græn ekki bara við það eins og allt annað?

Gáið sjálf á vef RÚV: http://dagskra.ruv.is/streaming/sjonvarpid/?file=4348956

p.s. Á eftir kemur myndband Sjálfstæðisflokksins. Þið getið skoðað það líka ef þið nennið.

Megrunarlausi dagurinn

2007-05-06T11:30:00.000Z

Í dag er megrunarlausi dagurinn.

Það er frábært framtak. Ekki bara af því að verið að berjast á móti hinni lífshættulegu átröskun, heldur líka að hugmyndafræðin inniber einnig að fagna beri hvers kyns fjölbreytni. ást og umhyggja eru mikilvæg. Hér á eftir fara nokkur vel valdar yfirskriftir af eldri færslu af bloggi megrunarlausa dagsins: Eflum líkamsmynd barna og unglinga:
http://likamsvirding.blogspot.com/2007/05/hr-eftir-fara-nokkur-g-r-til-ess.html

1. Allir eru öðruvísi
2. Lifum góðu lífi
3. Útrýmum
4. Elskaðu líkama þinn
5. Hafnaðu megrunarmenningunni
6. Kenndu barninu þínu að líkami þess sé góður líkami
7. Hlustaðu á barnið þitt
8. Hegðun en ekki holdafar

Kíkiði endilega á:
http://likamsvirding.blogspot.com/

Kvöldið er komið - herrakvöld FH með Ögmundi Jónassyni

2007-05-05T00:32:00.000Z

Nú er komið kvöld og lokin á löngum degi, sem endaði á herrakvöldi hjá FH. Þar var ég framan af, heyrði ræður framsögumanna sem voru ræðumenn frá stjórnmálaflokkunum.

Það var tekið vel á móti okkur og við þökkum auðvitað fyrir okkur.

Mér fannst vinir mínir í FH ekki vera allir jafn kurteisir við alla frambjóðendur sem þeir höfðu boðið til sín. Ekki þurftum við Ögmundur að kvarta, okkur var vel og kurteislega tekið. Sama má ekki segja um viðtökur gagnvart Samúel Erni sem kom frá framsóknarflokknum, en á hann var baulað þegar hann gekk af sviðinu. Sama var reyndar upp á teningnum þegar Jakob Frímann tók upp á þeim sérkennilegheitum að óska eftir því að fyrir hann væri sunginn afmælissöngurinn.

Kannski hef ég ekki áttað mig á því hvaðan í salnum baulið kom, kannski var þetta hreinlega einhver hluti gesta sem ekki tilheyra félaginu.

Frjálslyndi flokkurinn hefur trúlega ekki séð sér fært að mæta, en annars var þarna ágæt dekkun.

Gunnar Svavarsson sagði undir sinni ræðu að hann byggist við því að kjósendur rötuðu allir "heim á sinn bás". Þetta þótti mér ekki lýsa mikill bjartsýni á það að okkur takist að fella ríkisstjórnina eftir viku. Eins er það svo að atkvæði eru ekki bundin á bás. Engin á þau,nema kjósendur, hver og einn eitt atkvæði.

Bjarni Benediktsson var með nokkuð undirbúna ræðu sem var sæmilega undirbúin en kannski ekki nægilega vel æfð.

Ég vil þakka fyrir mig, á fyrsta herrakvöldi íþróttafélags sem ég hef farið á. FH-ingar tóku á móti okkur með sóma - eins og þeim ber.

Fellum ríkisstjórnina - og sendum Guðfríði Lilju á þing

2007-05-03T19:59:00.000Z

Nú er ríkisstjórnin fallin í tveimur stærstu kjördæmum landsins. Ef við skoðum tvær seinustu skoðanakannanir. En kannanir eru bara kannanir. Við viljum tryggja nýja ríkisstjórn að loknum kosningum - ný sjónarmið.

Mælingar sýna að breytingar á fylgi flokkana frá seinustu kosningum hér í kjördæminu eru þær að við erum að bæta við okkur. Við erum að tvöfalda fylgið.

Til þess að innsigla fall stjórnarinnar, innsigla að við skiptum um kúrs, þá viljum við sjá Guðfríði Lilju Grétarsdóttur á þingi. Þannig andæfum við Írak-stjórninni. Þannig andæfum við stóriðjustefnunni. Þannig andæfum við karllægri stefnu ríkisstjórnarinnar.

Enn einu sinni er víglínan um stefnuna hér í Kraganum. Hún var það þegar við kusum í Hafnarfirði - og hún er hér enn. Í Kraganum þarf VG sterka kosningu til þess að fella ríkisstjórnina. Þjóðin þarf það.

Þannig sláum við tvær flugur í einu höggi. Við tryggjum Guðfríði Lilju góða kosningu á þing -
. . .og fellum ríkisstjórnina.

Velferðarmálin mikilvægust - hvað vilja Vinstri græn gera?

2007-05-02T20:15:00.000Z

Í skoðanakönnun sem gerð var í Reykjavík norður koma fram að Velferðarmál vega þar þyngst. Af því tilefni er rétt að minna á áætlun okkar í málaflokknum:

http://vg.is/stefna/fataekt/

X-V 12. maí.

Kárahnjúkabólgan - hver borgar hagvaxtarbálið?

2007-04-28T22:41:00.000Z

Það er ljóst af fréttum undanfarið að það er pottur brotinn þegar kemur að aðbúnaði verkafólks uppi við Kárahnjúka. Við munum fyrst þegar vinnubúðirnar láku allar, og það kostaði harðfylgi, ekki síst frá verkalýðshreyfingunni, til þess að kippa málunum í liðinn.

En á ný sjást merki um að virðing fyrir fólkinu sem þarna starfar er líklegast ekki upp á marga fiska. Er aðbúnaður fólksins líðandi? Er forsvaranlegt að fyrirtækið hnupli lista yfir sjúklinga af læknastofunni uppi á hnjúkum?

Þarna sést líka, að hagvöxturinn sem ríkisstjórnin stærir sig gjarna af, Kárahnjúkabólgan sem við sjáum þegar við skoðum greiðsluseðlana af afborgun húsanna okkar sem fer bara upp á við, er m.a. til vegna þess að til er sparað í aðstæðum verkafólks sem kemur hingað til lands að selja vinnu sína.

Stuðningsmenn ríkisstjórnarinnar hafa stært sig af hagvexti, spurt hvort við sjáum ekki veisluna. Verkamennirnir á Kárahnjúkum sjá hana alla vega ekki. Þeim er greinilega ekki boðið.

Fundur fyrir unga kjósendur

2007-04-27T10:05:00.000Z

19200

Ungt fólk kýs

Tími: Laugardaginn 28. apríl kl.
16-18 (húsið opnar 15:30)

Staður: Tjarnarbíó

Fundarstjórar: Halla Gunnarsdóttir
og Sölvi Tryggvason

SFR – stéttarfélag,

Starfsmannafélag
Reykjavíkurborgar

og Hitt húsið

bjóða ungu fólki
á hitting í tilefni kosninga.

Allir velkomnir meðan
húsrúm leyfir.

Fólk undir 25 ára
er þó sérstaklega velkomið.

Fundurinn verður
sendur beint út á netinu stundvíslega kl. 16:00 á slóðinni

http://straumur.nyherji.is/rvk.asp

Fólk fær að spyrja úr sal en
einnig er kvatt til að senda spurningar til frambjóðenda bæði fyrir
fund og á meðan honum stendur á netfangið:

ungtfolkkys@gmail.com

Fulltrúar flokkanna eru:

Ágúst Ólafur Ágústsson frá
Samfylkingunni

Birgir Ármannsson frá Sjálfstæðisflokknum

Guðjón Ólafur Jónsson frá Framsóknarflokknum

Katrín Jakobsdóttir frá Vinstri
grænum

Margrét Sverrisdóttir frá Íslandshreyfingunni

Valdimar Leó Friðriksson frá
Frjálslynda flokknum

Ekki er vitað hver kemur frá Baráttusamtökum
eldri borgara og öryrkja

Dregið úr útgjöldum til heilbrigðisþjónustu - mælistika misréttisins

2007-04-24T19:21:00.000Z

Pétur Gunnarsson gerir að umtalsefni sínu grein framkvæmdastjóra framsóknar á síðu sinni: http://hux.blog.is/blog/hux/entry/186964/. Þar haldi framkvæmdastjórinn því fram að framlög til heilbrigðisþjónustunnar hafi aukist undanfarin ár, þvert á það sem stjórnarandstaðan segir.

Við Vinstri græn notum ekki sömu mælistiku og núverandi ríkisstjórn, hlutfallslega aukningu um 49% frá árinu 1998. Við spyrjum, er auðveldara nú eða fyrir tólf árum að vera efnalítill og veikur. Svarið er að það er erfiðara nú.

Við sjáum á grafinu hér að ofan hvernig hefur dregið úr greiðslum úr sameiginlegum sjóðum til heilbrigðisþjónustunnar en aukist greiðslur beint úr buddum heimilanna. Framlögin úr buddunni voru tæp 12% 1980 en eru árið 2005 17%. Það er misrétti. Þessu viljum við Vinstri græn breyta http://vg.is/stefna/fataekt/

Með mælistiku misréttisins sést að það hefur dregið úr framlögum hins opinbera, því hlutfallslega eru þau lægri nú en áður.

Um Hrafnistukonur

2007-04-24T12:25:00.000Z

Mig langar til þess að hvetja alla til að lesa frábæran pistil Þorgerðar Einarsdóttur um Íslands Hrafnistukonur:

"Fráleitt er að kenna hinum lægst launuðu um verðbólguna enda er hún komin af stað án þess að það fólk hafi fengið eitt eða neitt" sagði Álfheiður Bjarnadóttir, talsmaður starfsfólks á hjúkrunarheimilum í fréttum Ríkisútvarpsins þ. 17. apríl.

http://bryddingar.blogspot.com/2006/04/slands-hrafnistukonur-frleitt-er-kenna.html

Áfram með heimsóknir VG um allt kjördæmið

2007-04-24T00:10:00.000Z

Við höldum áfram á vinnustaðaheimsóknum um kjördæmið. Var á ferð ásamt Ögmundi Jónassyni í Mosfellsbænum þar sem við heimsóttum félag aldraðra og Ögmundur var í pallborði fyrir okkur.

Það var vel tekið á móti okkur með fyrirtakskræsingum og við þökkuðum auðvitað fyrir okkur. Það er óþarfi að nefna að í málefnum aldraðara héldum við auðvitað á lofti tillögu okkar sem við fluttum ásamt öðrum í stjórnarandstöðunni um líferismál, þá sömu og stjórnarþingmenn felldu.

En við getum flutt hana aftur eftir 12. maí. Ef við fáum til þess fylgi.

Það yrði allt annað líf.

Þrír fálkar

2007-04-22T20:01:00.000Z

Ég skrapp á handboltaleik í dag - Haukar - Valur.

Valur unnu og urðu Íslandsmeistarar. Mér fannst við ekki sýna okkar mönnum nægilegan stuðning. Ég skil ekki af hverju. Við finnum það vel í Vinstri grænum hvað það skiptir máli að hafa frábæra stemmingu - enda skemmtum við okkur í VG alveg frábærlega. Alltaf stemming!

Það er merkilegt að Haukurinn í Haukamerkinu og Valurinn í Valsmerkinu er sá sami og Sjálfstæðisflokksins. Enda eiga þessar þrjár stofnanir rætur að rekja til sama uppruna.

Kannski er það þess vegna sem Sjálfstæðisflokkurinn er alltaf að skipta um lit - svona eins og Valur og Haukar skipta um búningslit eða form.

En fólk veit auðvitað að þetta eru sömu liðin - sami Sjálfstæðisflokkurinn.

Leyfum fuglinum að hvíla sig. Það væri allt of mikið að hafa hann í 20 ár.

e.s þann 24. apríl:

Björn Ingi segir þetta vera samtenging sem er með sérstökum hætti. Hins vegar er það svo að Friðrik úr KFUM kom að stofnun beggja liðanna, og innan KFUM voru lengi vel hluti af kjarna Reykjavíkurhluta Sjálfstæðisflokksins. Mér sýnist að Björn átti sig ekki á því að ég eigi við að Sjálfstæðisflokkurinn er sá sami, þrátt fyrir nýja liti og nýjan formann. Það gildir auðvitað líka um Framsóknarflokkinn.

Sjálfstæðisflokkinn í 20 ár?

2007-04-20T18:35:00.000Z

Þetta pistilbrot er ef síðu Ögmundar Jónassonar. Afgang pistilsins má finna á síðu hans hér.

Sjálfstæðisflokkurinn hefur nú setið að völdum í 16 ár samfleytt. Framsóknarflokkurinn hefur setið við kjötkatlana – þannig er stjórnarsetu þess flokks best lýst – í 12 ár. Vill þjóðin meira? Vilja menn enn eitt kjörtímabilið? Vilja menn 20 ára valdasetu Sjálfstæðisflokksins? Væri það hollt fyrir lýðræðið í landinu? Væri það hollt fyrir íslenskt samfélag? Skoðanakannanir að undanförnu gefa þær hrikalegu vísbendingar að ríkisstjórnin kunni að halda velli. Með enn sterkari Sjálfstæðisflokki en veikari Framsókn – nánast komin í göngugrindina svo gripið sé til orðfæris lesenda hér á síðunni. Hvers konar ríkisstjórn yrði þetta? Enn grimmara Íhald, Framsókn með enn slakari sjálfsmynd. Þetta er stórmál sem þarf að ræða.

Getur verið að kjósendur hafi ekki fengið nóg af Íraksstríðum, öryrkjadómum, svikum við fatlaða og aldraða, misrétti og misskiptingu að ógleymdri einkavinaspillingunni? Ég held að meirihluti þjóðarinnar sé búinn að fá nóg. Búinn að fá sig fullsaddan af stjórn þessara flokka – alla vega að sinni. Vinstrihreyfingin grænt framboð hefur talað mjög skýrt um stjórnarmynstur á komandi kjörtímabili. Hún hefur beint því til þjóðarinnar að kjósa Sjálfstæðisflokkinn og Framsóknarflokkinn út úr Stjórnarráðinu og opna dyrnar fyrir stjórnarandstöðunni. Ég er sannfærður um að það yrði okkar samfélagi fyrir bestu. Okkur tækist betur að jafna kjörin, tryggja jafnrétti, stuðla að stöðugleika í efnahagslífinu, þyrma náttúrunni og færa okkur reisn á alþjóðavettvangi.

Vantar ekki mikið til að fella stjórnina

2007-04-19T19:42:00.000Z

Síðasta skoðanakönnun Gallup sýnir að staðan er núna 33-30

Nú er ljóst að stjórnarandstaðan þarf að bæta við sig, og vantar í raun ekki nema herslumuninn til þess að stjórnin falli.

Ég hef fulla trú á þessari þjóð og því að það takist.

- Viljum við stjóriðjuflokkana áfram?
- Viljum við Írak stríðs-flokkana?
- Viljum við misrétti stéttanna?
- Viljum við áfram misrétti kynjanna?
- Við kusum ekki óstöðugleika í efnahagsmálum, en fengum hann samt.

- Við kusum ekki versnandi tannheilsu barna, en fengum hana samt.

- Við kusum ekki innrásarstríð í Írak, en fengum það samt.

- Við kusum ekki aukin gjöld og álögur á sjúklinga, en fengum það samt.

Við kjósum ríkisstjórnina burt í vor!

Rokkum til Vinstri!

2007-04-18T14:07:00.001Z

FÁ - Umhverfismennt - Tímamót

2007-04-17T19:43:00.000Z

Á ágætum fundi sem við frambjóðendur á SV-horninu fórum á í dag var mjög gaman. Við ræddum þar við kennara og annað starfsfólk Fjölbrautarskólans við Ármúla. Það var skemmtilegt að koma þangað og kynna menntastefnu okkar vinstri grænna og umhverfisstefnuna okkar. Á leiðinni inn fengu nemendur nokkur eintök af stórgóðu blaði UVG og svo auðvitað merki.

FÁ er flaggskip þegar kemur að skipulagningu fjarkennslu og hefur því sinnt vel nemendum sem vilja klára nám en eiga þess kannski ekki kost í heimabyggð. En FÁ á líka aðrar fallegar fjaðrir. FÁ er nefnilega fyrsti og enn sem komið er eini framhaldsskóli landsins sem hefur hlotið grænfánann. Aðrir sem hafa fengið þessa vottun eru til dæmi grunnskólinn Engidalsskóli í Hafnarfirði en þar þekki ég vel til því í þann skóla gengur eitt minna barna.

Ein þeirra sem hafa keyrt áfram grænfánaverkefnið við FÁ er Heiða. Hún spurði ágætrar spurningar um hvort ekki hefðu komið fram neinar hugmyndir um að setja umhverfisfræðslu inn í kjarnanám framhaldsskólans. Það væri ein leið. Sú hugmynd er vel skoðunarinnar virði og í anda kaflns um unhverfismennt í Grænni framtíð okkar í VG.

Heiða í FÁ á barn með gömlum félaga mínum og vini, Guðmundi Erlingssyni. Hann var að frumsýna bíómynd sem er vert að sjá. Myndin heitir Tímamót og Gummi leikstýrir. Ég ætla bara að endurtaka orð hans:

Heimildarmyndin "Tímamót" verður sýnd í Háskólabíói dagana 18.-22. apríl nk. Myndin fjallar um þá Guðjón, Sigurbjörn og Steinþór sem hafa búið saman á vistheimili fyrir þroskahefta í Mosfellsdal í áratugi. Þegar ákvörðun er tekin um að loka vistheimilinu tekur líf þeirra óvænta stefnu og þeir uppgötva nýjar hliðar á lífinu og sjálfum sér.

"Tímamót" er framleidd af Edisons lifandi ljósmyndum og markar sannkölluð tímamót í íslenskri heimildarmyndagerð. Myndin veitir áhorfendum óvænta innsýn í líf Guðjóns, Sigurbjörns og Steinþórs og fylgist með breytingum sem verða í lífi þeirra. Þeim er fylgt eftir á þriggja ára tímabili, allt frá því ákvörðun er tekin um að loka vistheimilinu og þar til þeir hafa komið sér fyrir á nýjum stað og aðlagast nýju lífi. Málefni þroskaheftra hafa tekið miklum stakkaskiptum á Íslandi á liðnum áratugum, þar sem þroskaheftir fá nú að lifa eins sjálfstæðu lífi og unnt er í eðlilegu samfélagi við aðra.

"Tímamót" endurspeglar þessar breytingar vel þar sem þeir félagar sem búið hafa á einangruðu vistheimili stóran hluta ævi sinnar takast á við þær breytingar sem nýjar búsetuaðstæður og aukið sjálfstæði hefur í för með sér.Athugið að líklega verður aðeins um þessa einu sýningarhelgi að ræða.

Hér má sjá stiklu fyrir myndina:
http://www.youtube.com/watch?v=0LqBQXwvhYI

Úr hringiðunni

2007-04-16T00:11:00.000Z

Nú er dagur að kveldi kominn. Það er tilvalið í kosningabaráttunni að taka bara börnin með sér - sérstaklega þegar hún er skemmtileg og fólkið gott.

Við byrjuðum á því að skella okkur í húsdýragarðinn, þar sem dýrin verða sífellt færri, en það er alltaf gaman að kíkja á dýrin, bæði í sveitinni og í henni Reykjavík.

Síðan var söngsmiðja VG þar sem Karl Olgeirsson og Þorvaldur Árnason léku undir nokkrum lögum sem allir tóku undir. Börnin sungu með, eða léku sér í kosningamiðstöðinni okkar Grensásveginum.

Þá var lagt af stað í Kragakaffi og heilsað upp á fólk þar. Það var afar ljúft og gaman að heimsækja tvær kosningamiðstöðvar sama daginn, og alls staðar líf og fjör og gott að koma.

Stefnumálin okkar ganga aftur í stefnu hvers stjórnmálaslokksins á fætur öðrum, umhverfismálin, aðgerðaáætlunin gegn fátækt, kvenfrelsisáherslurnar og þannig mætti lengi telja.

Já, það er gott þegar fleiri eru með Vinstri græn baráttumál!

Bætum kjörin - burt með fátækt | Græn framtíð - tímamótastefna

2007-04-11T10:07:00.000Z

Það var prýðileg kynning á aðgerðaáætlun VG til þess að útrýma fátækt á Íslandi í gær. Við opnuðum líka frábæra kosningamiðstöð í Kópavoginum. Á opnuninni voru ríflega 70 manns sem reglulega gaman var að hitta.

Í dag verður gefið út umfangsmikið rit sem geymir stefnumörkun flokksins til framtíðar, um sjálfbæra þróun samfélagsins. Þar má finna nýja kafla um loftslag, vatnið, stjórnsýslu umhverfismála, sjálfbært neyslumynstur og fleira. Þetta er endurskoðuð og endurbætt stefna flokksins frá 2001. Þarna er sú framtíð sem Íslendingar allir vilja fylgja.

Innflytjendur

2007-04-04T09:29:00.000Z

Það er ágæt grein eftir Tationu Latinovic í fréttablaðinu í dag. Ég hvet fólk til þess að lesa hana: http://visir.is/article/20070404/SKODANIR03/104040088/-1/SKODANIR. Þar er hvatning til þess að fólk kynni sér stefnu flokkana í málefnum innflytjenda.

Á landsfundi VG var kynnt stefna í innflytjendamálum.

Grunnstefnan er þannig:

Allir sem búa á Íslandi eiga að vera jafnir fyrir lögum og hafa þar með sömu réttindi og skyldur. Innflytjendur eru manneskjur eins og Íslendingar og þeim ber að sýna sömu virðingu og hverjum öðrum íbúa þessa lands.
Útilokað er að líta á málefni innflytjenda sem afmarkað viðfangsefni. Raunhæf stefna í þessum málum hlýtur að koma inn á flest eða öll svið stjórnmálanna og vera órjúfanlegur þáttur af heildarstefnumótun til framtíðar.
Innflytjendur verða að taka þátt í uppbyggingu íslensks þjóðfélags að öllu leyti. Í því skyni er þörf á gagnkvæmri aðlögun og samþættingu innflytjenda og íslensks samfélags.
Sveitarfélög setji sér fjölmenningarstefnu og þrói hana áfram. Sú vinna fari fram í samráði við innflytjendur.

Sjá nánar á: http://vg.is/malefni/landsfundur-2007/alyktanir/nr/1594

Það er mikilvægt að fara hvorki í öfgar í aðra áttina eða hina. Staðreyndin er sú að innflytjendur eru manneskjur. Hvaða stefnu höfum við gagnvart manneskjum??

Frelsi frá fátækt, menntunarleysi og veikindum

2007-04-03T09:34:00.000Z

Birtist áður í Morgunblaðinu þann 3. apríl 2007
EITTHVERT einkennilegasta háttalag hægrimanna, og reyndar fleiri pólitískra keppinauta Vinstri grænna, er afneitun. Þetta háttalag kemur missterkt fram eftir atvikum. Þegar markaðsfrjálshyggjan er varin er því til dæmis gjarnan slengt fram að annað sé forræðishyggja. Í ónefndu sveitarfélagi, sem ég þekki nokkuð til í, hefur það jafnvel heyrst að ekki mætti ræða með hvaða hætti skólastarf ætti að vera, það væri miðstýring og forræðishyggja.

Það er ekki þannig!
Annað tilbrigði við afneitun er þegar hægrimenn fullyrða að kynbundinnlaunamunur sé ekki til staðar. Seinast heyrði ég í morgunþætti á Stöð 2 þar sem vorustjórnmálakonurnar Guðfríður Lilja frá Vinstri grænum og Sigríður Andersen frá Sjálfstæðisflokki. Sigríður sagði að launamunur kynjanna ætti ekki við rök að styðjast, hún vissi meira að segja um tölfræðing sem væri bara búinn að gefast upp á að reyna að sýna fram á hvernig við „sem viljum hemja einstaklingsframtakið“ hefðum rangt fyrir okkur.

Fátækt – er ekki til!
Þriðja tilbrigðið er síðan þegar Hannes Hólmsteinn Gissurarson og Stefán Ólafsson eru að ræða um hvort fátækt sé til á Íslandi, hvort Gini-stuðullinn segi þetta, eða gefi hitt til kynna. Hannes Hólmsteinn heldur fram að fátækt á Íslandi sé engu meiri í dag en fyrir tólf árum. Þessar fullyrðingar Hannesar eru móðgandi. En þær eru ekki endilega móðgandi fyrir mig. Þær eru móðgandi fyrir þá sem eru fátækir.

Gini-stuðull eða VG-stuðull?
Ögmundur Jónasson hefur annan háttinn á við að skoða hvort fátækt hefur aukist á undanförnum tólf árum. Í Morgunblaðinu hinn 23. febrúar setur hann fram annan stuðul sem má kalla Ögmundarstuðulinn eða VG-stuðulinn. Hann er svona: Hvort er auðveldara nú eða fyrir tólf árum að vera:

tekjulítill og húsnæðislaus,
tekjulítill og heilsuveill,
tekjulítill og með börn á framfæri?

Niðurstaðan er að það er mun erfiðara nú. Það orsakast fyrst og fremst af því að ríkisstjórnin hefur vegið að öryggisneti velferðarkerfisins með svo miklu offorsi að það hefur skaðast stórkostlega. Tekjulítið fólk getur ekki eignast húsnæði í dag því félagslega kerfið er ónýtt, barnabætur hafa staðið í stað, sjúklingagjöld hafa aukist mjög og svo mætti áfram telja. Margt fólk hefur því einfaldlega ekki efni á að hafa sómasamlegt þak yfir höfuðið, verða veikt eða ala upp börn sem hafa sömu möguleika til að þroskast og önnur börn.

Þegar við leggjum mat á þjóðfélagið, á hina pólitísku umræðu, þá eigum við að gæta okkar á því að stimpla ekki endalaust, vísa á bug og benda út í loftið. Við eigum að sýna fólki þá virðingu að tala við það en ekki um það, og halda ekki fram að upplifanir þess séu lygi og tómt hjóm. Þeir sem upplifa að fyrirætlanir Vinstri grænna um betra skólastarf, að leiðrétta launamun kynjanna og útrýmingu fátæktar sé forsjárhyggja verða að eiga það við sig. Ég kýs að kalla það frelsi. Frelsi frá menntunarleysi, frelsi til jafnræðis og frelsi frá örbirgð.
Hverjir eru þá postular frelsisins í íslenskum stjórnmálum? Vinstri græn.

Áttatíu og átta atkvæði

2007-04-01T23:28:00.000Z

Með áttatíu og átta atkæðum var tónninn sleginn fyrir breytingar sem við stefnum að þann 12. maí.

Með áttatíu og átta atkvæðum stóðum við af okkur takmarkalausan fjáraustur erlends stórfyrirtækis.

Með áttatíu og átta atkvæðum, þrátt fyrir huglaust afstöðuleysi sem fól í sér samþykki fulltrúa meirihlutans í bæjarstjórn.

Með áttatíu og átta atkvæðum.

---------------------------------

Ég frétti af ungum pilti sem hefði minnst á kosninguna um Eiffel-turninn. Hann fékk að standa, kosið var um málið og Eiffel turninn stóð áfram, munurinn var aðeins eitt atkvæði. Þess vegna er París eins og hún er í dag, meðal annars.

Nú getur engin hugsað sér París án Eiffelturnsins.

Eftir nokkur ár getur enginn hugsað sér Hafnarfjörð með svo risastóru álveri.

Eftir nokkur ár getur enginn hugsað sér að Ísland verði stærsta álbræðsla í heimi.

Til upprifjunar - og meira til gamans

2007-03-30T23:23:00.000Z

Ýmislegt hefur höfuðsnillingur Össur digri Skarphéðinsson skrifað um dagana. Í dag er fólk í óðaönn að reyna að slá ryki í augu fólks með því að halda því fram að við Vinstri græn séum á móti íbúalýðræði er rétt að rifja upp eftirfarandi, eftir Össur:

Í Hafnarfirði er [...] Gestur, að gera allt vitlaust með því að heimta íbúakosningu um stækkun álversins. Samfylkingin er eiginlega búin að fallast á kosninguna. Það er tvíeggjað hjá Gunnari Svavarssyni og gamla bakarasveininum í stóli bæjarstjóra. Auðvitað verður stækkunin samþykkt, beint lýðræði treyst með kosningunni í anda Samfylkingarinnar - en Gestur litli Svavarsson mun koma út sem sigurvegari fyrir það eitt að knýja hana fram.Í kjölfarið mun hann verða efstur á lista VG einsog Svandís systir í Reykjavík. Hugsanlega gæti hann út á auglýsinguna sem hann og VG fá í tengslum við herferð fyrir íbúakjöri - og síðan í kosningunn sjálfri - ná það sterkri ímynd meðal bæjarbúa að hann skrapi inn sem bæjarfulltrúi. Þá kann svo að fara að Samfylkingin þurfi allt í einu að fara að semja við VG um stjórn bæjarins. Svo mínir menn ættu að hugsa sig tvisvar um áður en þeir hleypa þessu lengra.
Í framhaldinu er rétt að minna á að undirritaður var í fjórða sætinu á listanum okkar í Hafnarfirði síðast. Við fengum 12,4 % greiddra atkvæða, og "skröpuðum!?" inn bæjarfulltrúanum, Guðrúnu Ágústu Guðmundsdóttur.

(rétt er að geta þess að tilvitnunin er í blogg Össurar frá 1. september 2005).

Eitthvað annað - og meiriháttar mál

2007-03-30T22:25:00.000Z

31. mars er á morgun og Hafnfirðingar ganga til atkvæða um stækkun álversins. Hafnfirðingar, sem nú er eins og tvær þjóðir, grænir eða gráir, sama eða stærra álver.

Það hefur svo oft verið spurt um eitthvað annað. Hvað er eitthvað annað? Hva meinið þið vinstri græn?

Mig langar að benda á pistil eftir Ásbjörn Björgvinsson, þar sem hann útskýrir eitthvað annað:
http://www.vg.is/morgunposturinn/nr/1710 Það sem er skemmtilegast í honum er einmitt umræðan um að fáir flokkar hafa verið krafðir jafn mikið um lausnir í atvinnumálum og VG. Á móti má spyrja, ber stjórnmálaflokkum að miðstýra atvinnuuppbyggingunni? Eiga þeir ekki að skapa umgjörð og gefa fólki möguleika á að nýta þeirra eigin tækifæri?

---------------------------------

Las grein Gunnar Svavarssonar oddvita Samfylkingarinnar í SV-kjördæmi þar sem hann fjallar um grein Hjörleifs Guttormssonar í fréttablaðinu. Hjörleif Guttormsson sem hefur verið ötullbaráttumaður í baráttunni við ál-æðið, sakar Gunnar um hroka.

Ég er ekki sammála því að menn sem hafa verið, að mínu mati málaðir út í horn, eins og Gunnar Svavarsson hefur verið gerður með þetta mál, hafi rétt á því að beita hvaða brögðum sem er til þess að reyna að leiða athyglina frá sinni eigin slæmu stöðu. Það finnst mér Gunnar vera að reyna að gera með þessum pistli.

Nú nýverið var Gunnar með yfirlýsingar á opnum fundi á vegum Hafnarfjarðarbæjar að sátt hefði ríkt um ferlið innan bæjarstjórnar Hafnarfjarðar. Allir landsmenn vita að svo var ekki.

Gunnar hefur orðið uppvís að því að kalla til í málflutningi sínum afstöðu ýmissa lykilmanna VG í verkalýðshreyfingunni í Hafnarfirði? Hvers lags dylgjur eru þetta? Þetta eru ekki sæmileg orð. Hvaða lykilmenn eru það? Er Gunnar þess umkominn að útnefna lykilmenn Vinstri grænna í Hafnarfirði?

Gunnar nefnir að bæjarfulltrúi VG hafi staðið að ákvörðun um íbúakosningu. Að sjálfsögðu var það svo. Við erum flokkur íbúalýðræðis og þjóðaratkvæðagreiðsla. Við vildum t.a.m. láta greiða þjóðaratkvæði um Kárahnjúkavirkjun ólíkt mörgum öðrum.

Hins vegar var öllum breytingartillögu bæjarfulltrúans um ferlið sjálft felldar, og auk þess má einnig minna á að ekki ríkti heldur einhugur um málsmeðferðarreglur þær sem meirihluti Samfylkingarinnar samþykkti. Þetta nefnir Gunnar ekki.

Hann hefur heldur aldrei minnst á að krafan um íbúakosningu um málið var fyrst komin frá almennum félagsfundi Vinstri Grænna í Hafnarfirði. Einmitt því stækkunaráformin eru meirháttarmál. En ekki af því að stækkunin væri meiriháttar vandræðamál fyrir sitjandi meirihluta. Atkvæðagreiðslur eru ekki ætlaðar til þess. Það stendur ekki í samþykktum bæjarins.

Konur - VG - Atkvæðagreiðslan í Hafnarfirði

2007-03-23T16:12:00.000Z

Nú er það svo að á þingi munu sitja níu konur - og átta karlar fyrir okkur Vinstri Græn. Slíkur árangur er betri en á seinasta kynjabarómetri, þar sem við höfðum átta konur og sjö karla.

Ég er mjög feginn því að vera í góðum hópi þessa frábæra fólks, í mínum flokki - í okkar flokki.

---------------------------------------------------

Á undanförnum dögum hafa verið þrír fundir í Hafnarfirðinum þar sem var verið að fjalla um Umhverfið, um skipulagsmál og um efnahag vegna fyrirhugaðrar stækkunar í Straumsvík. Við höfum mætt sómasamlega og hlýtt á framsögur og umræðu, undirritaður ásamt Guðfríði Lilju, Guðrúnu Ágústu, Jóni Páli, Margréti, Jóni Ólafs og mun fleirum.

Á laugardaginn eftir viku verður kosið. Sama hvernig sú atkvæðagreiðsla fer, þá er ljóst að baráttunni er hvergi nærri lokið. Baráttunni við yfirráð erlendra risafyrirtækja, sem reyna á ófyrirleitinn hátt að hafa áhrif á lýðræðislega atkvæðagreiðslu sem skiptir sköpum í baráttunni við stóriðjustefnuna.

Baráttunni við stóriðjustefnu ríkisstjórnar Íslands

Það verða aðrar kosningar þann 12. maí.

Hugur

2007-03-19T23:55:00.000Z

Það var hugur í fólki í Austurbæ í kvöld.

Það var hugur í fólki sem vildi að Ísland væri friðelskandi þjóð.

Það var hugur í fólki sem vildi ekki taka þátt í innrásarstríði.

Og það var hugur í fólki sem vildi fella ríkisstjórnina sem bar ábyrgðina fyrir okkar hönd. . .

Skrifaði undir stríðyfirlýsingu. . .

Og það var hugur í fólki sem ekki vildi það aftur.

Ekki í okkar nafni!

Með friði

2007-03-19T12:21:00.000Z

Senn eru liðin fjögur ár frá því að innrás Bandaríkjamanna og bandalagsríkja þeirra í Írak hófst, með formlegum stuðningi íslenskra stjórnvalda. Þrátt fyrir ítrekaðar yfirlýsingar ráðamanna í BNA um að friður sé að komast á í landinu, er ekkert lát á óöldinni í Írak og sífellt fleirum verður ljóst hvaða hörmungar stríðið hefur kallað yfir írösku þjóðina.

Mánudagskvöldið 19. mars munu hinir staðföstu stríðsandstæðingar efna til baráttusamkomu í Austurbæ, þar sem hernáminu verður mótmælt og þess krafist að íslensk stjórnvöld axli ábyrgð vegna hins svívirðilega stuðnings við ólöglegt árásarstríð.

Dagskráin hefst kl. 20.
Ávörp flytja:Guðfríður Lilja Grétarsdóttir og Helgi Hjörvar
Tónlistaratriði:XXX Rottweilerhundar,
Ólöf Arnalds
& Vilhelm Anton Jónsson

Upplestur:Bragi Ólafsson
Kynnir:Davíð Þór Jónsson
Hinir staðföstu stríðsandstæðingar eru:
Samtök hernaðarandstæðinga
MFÍK
Þjóðarhreyfingin - með lýðræði
Ung vinstri græn
& Ungir Jafnaðarmenn

Svartur dagur í sögu lýðræðis

2007-03-17T21:32:00.000Z

(áður birt á Morgunpósti VG og víðar)

Þann 31. mars verða nokkur stórtíðindi í sögu lýðræðis á Íslandi. Þá ganga Hafnfirðingar til atkvæðagreiðslu um stækkun álversins í Straumsvík. Og ég held því fram að sama hvort fólk er hlynnt eða andvígt stækkuninni, sama hvort fólk er sammála því að málatilbúnaður hafi verið til fyrirmyndar eða deili um aðra þætti sem að atkvæðagreiðslunni snúa, þá er þetta vissulega sögulegur atburður, um það verður varla deilt.

En því miður á þessi sögulegi atburður sér eina hlið sem er trúlega sú svartasta. Hún snýst ekki um það hvort og hvernig ráðamenn bæjarins Hafnarfjarðar gefa, eða gefa ekki upp afstöðu sína. Hún snýst ekki um hvort stækkun er kölluð sínu rétta nafni, eða útbúin sem tillaga að deiliskipulagi. Hún snýst heldur ekki um firruna við það hvernig sitjandi meirihluti í Hafnarfirði hefur gert og mun gera eftir sem áður, eigna sér hugmyndina að lýðræðislegum kosningum. Nei, svartasta hlið lýðræðisins á Íslandi, eða kannski lýðræðisleysisins, er hversu ójafn og þannig ólýðræðisleg framkvæmd lýðræðisins er.

Alcan út úr kosningabaráttunni!
Sá sögulegi atburður hefur nefnilega orðið á Íslandi, sennilega í fyrsta sinn, að purkunarlaust er notað fjármagn erlendra auðhringa til þess að hafa áhrif á viðhorf kjósenda. Athæfið er fullkomlega siðlaust og skammarlegt. Hvar annars staðar finnast sambærileg dæmi þess að þeir sem eiga hagsmuna að gæta troði sér - með góðu eða illu - inn í samfélagið eins og Alcan gerir nú í Hafnarfirði ?

Nú nýverið voru samþykkt á Íslandi lög um að framlög til stjórnmálaflokka frá Íslensku fyrirtækjum mættu ekki fara yfir 300.000 krónur. Ég held að Alcan sé komið vel nálægt hundraðfaldri þeirri tölu, eða muni gera áður en yfir lýkur. Hegðun fyrirtækisins ber vott um ósvífni, yfirgang og siðleysi sem ætti ekki að líðast í nokkru einasta sómakæru fyrirtæki.

Ég fer þess vegna fram á að Alcan fari út úr kosningabaráttunni, dragi sig til baka með alla sína milljarða - og láti Hafnfirðinga í friði.

Kynjahlutföll á þingi - VG með flestar konur á þingi

2007-03-05T11:12:00.000Z

Skoðanakannanir hafa tvenns konar hlutverk. Þær eru vísbendingar og hafa skemmtanagildi. Í samræmi við það ætla ég að birta hér lítið graf sem sýnir stöðu karla og kvenna á þingi, eftir flokkum, færu þingkosningar í samræmi við niðurstöðu seinust Capacent-könnunar:

Það má líka líta á hvort kyn fyrir sig og skoða úr hvaða flokkum konurnar og karlarnir koma. Þá má sjá að Vinstri-græn eiga flestar konur á þingi miðað við þessar tölur:

Það er að sjálfsögðu með ráðum gert að hafa vinstri-græn hér með bleikum lit, en venjulegast, þá notar maður þann rauða.

Hvers vegna er fólk að kjósa stjórnmálaflokka

2007-03-02T16:17:00.000Z

Í þjóðarpúlsi Gallup / Capacent, (http://gallup.is/?PageID=762&NewsID=724) sem fólk heldur vonandi út vikulega héðan í frá fram að kosningum, er að skoða fleiri hluti en sjálft fylgið. Í dag er skoðað hvers vegna fólk segist ætla að kjósa hvern flokkanna fimm. Þær niðurstöður eru merkilegar fyrir margt og af niðurstöðunum má draga nokkrar ályktanir:

1. Frjálslyndir eru að fá stóran hluta fylgis síns vegna málaflutnings síns um innflytjendur og innflytjendamál. Það er meira að segja svo að þau mál eru frekar nefnd enn fiskveiðistjórnunarmáli, sem hefur verið hrygglengjan í flokknum.

2. Flestir þeirra sem kjósa framsókn gera það af gömlum vana.

3. Af ástæðum til þess að kjósa VG nefna flestir stefnu og málefni flokksins, síðan tiltaka margir umhverfismálin sérstaklega.

4. Traust nefna allir kjósendur V, S og D, en enginn kjósenda F eða B lista.

Fleira má svo sem lesa úr þessu, en þetta er það sem ég sé.

Um stjórnarmynstur - allir vilja vinna með Vinstri grænum

2007-03-01T12:26:00.000Z

Það hefur verið vaninn að fara varlega í yfirlýsingar um stjórnarmynstur fyrir kosningar. Mig langar samt að skoða hvort eitthvað í málefnaskrám annarra flokka kallast á við það sem VG lagði fram á landsfundi sínum. Það væri þá ekki til þess að skýra nokkurn hlut, heldur auðvitað bara til þess að leggja áherslu á hvernig flokkalýðræðið hjá okkur virkar, við kjósum flokka og höfum síðan hefð fyroir meirihlutastjórn. Það þýðir að flokkar, sem eru ólíkir þurfa að starfa saman.

Hér er svo listinn. Tekið er fram að landsfundir Samfylkingar og Sjálfstæðisflokks verða eftir daginn í dag svo ég verð að miða við önnur plögg:

1. Framsókn og VG
- Í drögum að ályktunum flokksráðs framsóknarflokksins er lagt til að leikskólinn verði gjaldfrjáls. Þarna tekur framsókn undir hugmyndir VG um gjaldfrjálsan leikskóla. Það gerði hann reyndar ekki í Kópavogi, frekar en aðrir flokkar þar í meiri eða minnihluta. Raunar hefur leikskólastigið verið gert gjaldfrjálst á einum stað eftir seinustu sveitarstjórnarkosningum. Hvar? jú í Mosfellsbæ, þar sem VG er í meirihluta.

Framsóknarflokkurinn hefur þó verið staðinn að því að fara á svig við eigin loforð, líkt og sást til dæmis fyrir seinustu bæjarstjórnarkosningar í stærsta hreppi Íslands, Reykjavík.

2. Sjálfstæðisflokkur eins og VG
- Mér fannst erfitt að finna eitthvað í stefnuskrá Sjálfstæðisflokksins sem kallaðist á við stefnu VG. Vissulega má nefna nýja græna fálkann, en græni liturinn er kominn á alla flokka í dag, í mismiklu magni þó.

3. Samfylking og VG
- Hér er kannski best að taka eitt af stefnumiðum kvennaþings samfylkingarinnar, en þar lagt til að fjölga konum í stjórnum fyrirtækja með því að gefa almenningshlutafélögum frest til 6 ára til að koma hlutfalli kvenna upp í 40% í stjórnum sínum. Þegar í stað verði komið upp samráðsvettvangi stjórnvalda og atvinnulífs og ef nauðsyn krefur, beitt lagasetningum.

Ég ætla ekki að halda því fram að þetta sé sérstakt baráttumál okkar í VG frekar en þeirra í Samfylkingunni. Þetta er fyrst og fremst baráttumál róttækra femínista.
Leiðrétting: Auðvitað er þetta baraáttumál okkar í VG. Það sem hér er átt við er að þetta sé ekki eitt þeirra mála sem hægt er að fara í rifrildi um hver hafi átt frumkvæði að. Frumkvæðið kemur úr röðum róttækra femínista.

4. Frjálslyndir og VG
- Trúlegast er helst hægt að draga líkindi milli umhverfisstefnu VG og Frjálslyndra þegar kemur að umræðunni um umhverfisvernd hafanna. En auðvitað má líka nefna gjaldfrjálsa leikskólann hér líka, líkt og hjá framsókn.

En þegar til kastanna kemur, þá er kannski best að huga að þáttum eins og trúverðugleika. Hverjum treystum við best til að. . . .

Þá er þetta ekki spurning hvað við gerum 12. maí.

Dagurinn í dag - Þórunn Sveinbjarnardóttir með VG með náttúru

2007-02-22T00:11:00.000Z

Það var góður dagur í dag. Hann hófst með morgunverðarfundi kvennahreyfingarinnar - þar sem umræðan snerist um kynbundið ofbeldi og aðgerðir gegn því. Í pallborð voru mættir fulltrúar allra stjórnmálaflokka sem nú sitja á þingi. Það var einkar ánægjulegt að allir tóku þeir vel í að leggja málstaðnum og baráttunni lið, þótt forsendurnar væru auðvitað misjafnar.

Okkar fulltrú, Steingrímur J. Sigfússon, fór yfir þær aðgerðir sem við Vinstri græn leggjum til, og liggja nú fyrir í drögum að plaggi sem lagt verður fyrir landsfund flokksins um næstu helgi. Nánar um þetta má sjá á http://XV.IS.

Nú í kvöld var haldinn fundur á vegum Samfylkingarfólks (NB ekki Samfylkingarinnar - skilst að þetta skipti nokkru máli) í Hafnarfirði um álversstækkunina. Þar voru frummælendur Jón Baldvin, Tryggvi Harðarson og Þórunn Sveinbjarnardóttir. Tryggvi talaði heldur fyrir því að gott væri að eiga álversstækkun í pokahorninu, á meðan Þórunn talaði um aðstöðumun fyrirtækisins og þeirra sem á móti stækkun væru.

Okkar kona, Guðfríður Lilja Grétarsdóttir tók til máls á fundinum og benti á hversu leitt það væri þegar samherjar okkar í málinu væru að níða skóinn af samherjum sínum í baráttunni gegn stóriðjustefnunni. Það væri í raun grátlegt þegar einn framsögumanna væri að slíta orð Formanns VG um virkjanakosti úr samhengi við umræðuna sem þau væru sögð í og taka þann ósið upp eftir Valgerði Sverrisdóttur sem gerði allt til þess að þvo hendur sínar af verkum sínum í Iðnaðarráðuneytinu. Það var ljótur leikur hjá einum framsögumanna. Guðfríður Lilja tók undir með Þórunni Sveinbjarnardóttur sem benti á aðstöðumun stórfyrirtækisins og þeirra sem á móti eru, og kallaði eftir því að leiðtogar stjórnmálaflokka sem hefðu lýst því yfir að þeir væru andvígir álversstækkuninni töluðu skýrt í þessu máli og tækju afstöðu.

Það var vel klappað undir ræðu Guðfríðar Lilju, ekki síst þegar hún ræddi um hvernig bæjarstjórinn í Hafnarfirði segði að enn treysti hann sér ekki til að taka afstöðu þar sem málavextir lægju ekki enn fyrir. Á sama tíma er utankjörfundaratkvæðagreiðslan um málið hafin.

Fleiri loforð - nú jarðgöng

2007-02-11T00:08:00.000Z

Enn eitt dæmið um kosningaskjáfta ríkisstjórnarflokkanna. Nú er röðin komin að Sturlu. Hvorki meira né minna en átta ný jarðgöng.

Sjá hér

Auðvitað eru jarðgöngin kærkomin. Allir þessir staðir, þjóðin hefur verið svikin um þessi jarðgöng hingað til. Á svipaðan hátt og Háskóli Íslands var svikin um fjárframlög.

Núna skelfur ríkisstjórnin - og á krampakenndan hátt er lofað.

Kosningaskrifstofur hafa verið opnaðar í fjórum ráðuneytum. Og fleiri á leiðinni.

Listir, menningarmál og fleira - Viðreisnarmeirihlutinn í Hafnarfirði

2007-02-08T23:05:00.000Z

Ég heyrði í fréttum RÚV í dag Þorunn Sigurðardóttir, sem hefur verið framkvæmdastýra, eða stjórnandi listahátíðar um nokkurt skeið, nefnir að það verði að gæta þess að Listahátíð megi ekki verða of háð fjármagni fyrirtækja. Flestir vita að Þórunn hefur sinnt starfinu á skeleggan hátt og lagt ýmislegt til svo listahátíð í Reykjavík sé sem glæsilegust. Það gladdi mig að heyra að hún var sama sinnis og við hér í Hafnarfirði, en bæjarfulltrúi okkar lagði fram bókun þar sem kallað var eftir stefnumörkun vegna samstarfssamninga einkafyrirtækja við bæinn.

Það er skemmst frá því að segja að líkt og svo oft áður voru Sjálfstæðisflokkur og Samfylking hönd í hönd hér í Hafnarfirði og bókuðu við þetta tækifæri að þeir fögnuðu því að ókeypis aðgangur væri nú að byggðasafninu og Hafnarborg í Hafnarfirði á kostnað Glitnis.

Við fögnum því að bæjarbúar fái að njóta listarinnar - en á ábyrgð hverra?

Finnskur femínismi

2007-02-02T00:08:00.000Z

Það eru athyglisverðar fréttir frá Finnlandi. Þar eru fimm konur úr fimm flokkum sem leggja fram 14 kröfur um jafnrétti. Þetta las ég á heimasíðu Kvennasögusafnsins, sem er merkilegt safn (þau eru svo sem mörg).

Það er ánægjulegt þegar flokkar vinna saman að svona málum, eða öllu heldur þegar unnið er þvert á flokka að ákveðnum málum.

Ég hefði viljað sjá meiri samstöðu um Kárahnjúka hér um árið, meiri samstöðu um lýðræðislegar kosningar um virkjunina, meiri samstöðu um sænsku leiðina á þingi. Það tókst þó að lokum að fá breiðan front á það mál - þó lyktir hefðu mátt vera betri.

Reyndar hefur einnig fengist breið samstaða um önnur VG-mál. Til dæmis var samþykkt samhljóða á þingi þingsályktunartillaga um stuðning við lítil og meðalstór fyrirtæki.

Og fyrst við erum að tala um atvinnustefnu VG, sem á stefnuna ekki lengur ein því að allir eru sammála um hana, þá má nefna í því samhengi og vekja athygli á Sprotaþingi nú um helgina.

Þar verða þingmenn VG og annarra stjórnmálaflokka líka.

Kosningar 10. Febrúar - 31. mars - 12.maí

2007-01-24T11:07:00.000Z

Þessi dagur gæti orðið merkisdagur. Þetta gæti orðið merkisdagur fyrir aðkomu fólks að fótboltanum. Þetta gæti orðið áfangasigur í baráttunni fyrir kvenfrelsi; á einhvern hátt symbólskur, en ekki síður yrði um raunverulegar áherslubreytingar að ræða.

Af því að þann 10. febrúar er formannskjör KSÍ. Og Halla Gunnarsdóttir ber þar af öðrum formannskandídötum. Þess vegna kjósum við Höllu. Ég hvet alla til þess að skrifa á stuðningslistann hennar: http://halla-ksi.blog.is/blog/halla-ksi/guestbook/.

Næsti kjördagur er enn aðeins hugmynd. Hugmynd að kjördegi um stækkun álversins í Straumsvík. Ég vil vísa í bókun VG frá seinasta flokksráðsfundi (sjá http://xv.is) en annars bendir margt til þess að þegar kosið verði um stækkunina verði straumhvörf í margri baráttunni. Það verða straumhvörf í baráttunni fyrir náttúrunni, og það verða straumhvörf í baráttunni gegn stóriðjustefnunni.

Ég er reyndar á því að mun meira mæli með því að hafa kosninguna samhliða þingkosningunum þann 12. maí. Bæði eru það hagkvæmnisrök, því kosningin kostar minna, en einnig er líklegra að þátttakan verði meiri. Svo sakar ekki að geta kosið á sama deginum um stóriðjustefnuna, á tveimur kjörseðlum.

En ég vona að kosningasigur Höllu þann 10. febrúar, og kosningasigur náttúrunnar í kosningum um álversstækkunina verði undanfari stærri sigurs þann 12. maí. Þá fellum við ríkisstjórnina og blásum til aðgerða.

Aðgerða með kvenfrelsi, með náttúrunni. Íslendingar vilja breytingar á báðum sviðum.

Frábær flokksráðsfundur - Þess vegna kjósum við Vinstri græn

2007-01-22T10:37:00.000Z

Það var góður flokksráðsfundur um helgina. Ég hvet fólk til þess að kynna sér ályktanir fundarins á http://XV.is.

Einnig slógu varaformaður og formaður flokksins í trumbur (ekki þó bókstaflega) og bentu á um hvað væri kosið þann 12. maí.

Það sem þau nefndu voru vísuðu öll til framtíðarinnar og þá sýn sem við höfum á hana, hvernig við getum lært af fortíðinni og fengist við nútíðina.

Kvenfrelsismálin
Efnahagsmálin
Umhverfis- og náttúrumálin
Jöfnuð og velferðarmál
Atvinnu- og byggðamálin
Sjálfstæða utanríkisstefnu

Það er ekki skrýtið að þessi mál séu nefnd. Það er í þessum málaflokkum sem þjóðin vill sjá breytingu. Það vill aðgerðir í kvenfrelsismálum. Það vill að afrakstur þjóðarsáttarsamninganna sem voru gerðir forðum daga verði ekki kastað út um gluggann nokkrir auðmenn gerðir ríkir, á meðan almenningur borgar brúsann og stöðugleikanum verði kastað á bálið. Það vill ekki sjá aðra Kárahnjúkavirkjun og stóriðjustefnuna. Það vill ekki hafa þjóðina skipta upp í ríka og fátæka. Ekki heldur dreifbýli og höfuðborgarsvæði. Það eru allir andsnúnir þjónkun undir Írak þjóðirnar.

Þess vegna verður að snúa við blaðinu. Skýrustu viðsnúningsskilaboðin eru að kjósa VG. Þess vegna.

Sjálfstæði Háskóla Íslands - syndir feðranna - SA í skólarekstri

2007-01-19T11:44:00.000Z

Ég hef alltaf verið talsmaður þess að Háskóli Íslands eigi að njóta sjálfstæðis. Enda er það svo að mörgu leyti. Lagaumhverfi Háskólans er til að mynda um margt annað en annarra stofnanna. Því miður hefur oftar en ekki verið vegið að sjálfstæði Háskólans með takmörkun fjármagns og hagræðingarkröfum sem ættaðar eru hvaðan, jú úr menntamálaráðuneytinu.

Það var vel til fundið af menntamálaráðherra nú að auka fjármagn til Háskóla Íslands. Enda er það sjálfsagt í fyrsta skipti sem fjármagn við HÍ er aukið, í tæpa tvo áratugi, eða allan valdatíma Sjálfstæðisflokksins. Þorgerður Katrín reynir að bæta fyrir syndir feðranna. Reyndar er hún að lofa svolítið fram í tímann, gerir samninga með fyrirvara um samþykki Alþingis. Ég tel ólíklegt að einhver muni standa fyrir því að gera Þorgerði Katrínu að ómerkingi orða sinna hvað það varðar. Hitt er auðvitað annað að hún á það undir meirihluta 63 einstaklinga á næsta alþingi Íslendinga.

En er ekki vegið að sjálftstæði Háskóla Íslands úr annarri átt? Nú eru Samtök atvinnulísins að fara fram á það að Háskóli Íslands endurskoði afstöðu sína til þess að veita Ágústi Einarssyni launalaust leyfi meðan hann sinni rektorsstöðu við Háskólann á Bifröst. Að sjálfsögðu mega þessi samtök hafa sína skoðun, og eins láta hana í ljósi. Á sama hátt er mér frjálst að segja að það kemur Samtökum atvinnulífsins ekki við hvernig ákvörðunum um þessi mál er háttað hjá Háskóla Íslands. Það er ekki þeirra mál að hlutast til um málefni Háskólans okkar allra. Eins og Samtök atvinnulífsins segja sjálf, þá standa þau bæði að HR og Bifröst og gott eitt um það að segja. En það á að nægja að þau hlutist til um rekstur þeirra skóla - það er frekt af þeim að ætlast til þess að þau stjórni Háskóla Íslands sömuleiðis.

Að gefnu tilefni. . .

2007-01-17T15:37:00.000Z

Tel ég rétt að vísa í færslu Gríms Atlasonar bæjarstjóra, þar sem hann minnir á hugmyndir um greiningarstöð. Nú er lag að endurskoða fyrirbærið allt, allt meðferðarbatteríið eins og það leggur sig.

Byrgismálið sýnir aðeins einn lítinn anga af þessu öllu saman og kemur huganum af stað um það sem betur má fara.

Ég er sammála bæjarstjóranum. Það er nauðsynlegt að skoða greiningarstöð. Það er ágætt að láta slíka tillögu falla í frjóan jarðveg í kjölfar umræðunnar undanfarið. Einnig vil ég mælast til þess að hinn angi málsins, sá sem fjallar um meinta misnotkun verði rannsakaður ofan í kjölinn. Núna strax.

Aðferðir stjórnmálamanna

2007-01-15T11:13:00.000Z

Það var ánægjulegt að heyra í Silfri Egils á sunnudag að fólk virtist sammála um að það væri ekkert óeðlilegt við það að vilja vera "mesti feministinn" eða "besti umhverfissinninn". Heilbrigð íþróttamannsleg keppni er af hinu góða, og ekkert ætti að vera málstaðnum til framdráttar, þar sem hver og einn reynir að draga verkefnið áfram. (Það er næsta óþarfi að nefna að með vísan í heilbrigða, á ég við að mér hugnast ekki óheilbrigð skrif Dofra Hermannssonar á heimasíðu hans, þar sem hann gerir undirrituðum og fleirum upp skoðanir og finnst eðlilegt að dæma á grundvelli þeirra).

Þannig er það málstaðnum til framdráttar að benda á:

1. Að Guðrún Ágústa Guðmundsdóttir lýsir hvernig það er eðlilegra að kjósa um stækkun álversins, í stað deiliskipulagsins.

2. Að bæjarstjórnarflokkur VG í Hafnarfirði lagði til styrkveitingar til Sólar í Straumi, til þess að standa undir kostnaði við baráttuna, enda við ofurefli að etja.

3. Að þrátt fyrir að kýta í mesta bróðerni um hver sé heilli og betri umhverfisflokkur, VG eða Samfylkingin (og velkist ég reyndar ekki í vafa um hvað mér finnst sjálfum), þá má benda á það að báðir aðilar stefna að sama marki - að rétta hlut náttúrunnar, og eru andvígir stækkun álversins í Straumsvík. Eða hvað?

Alcan gefur ekki upp í hverju samkomulagið felst

2007-01-12T10:31:00.000Z

Það er ekki laust við að manni renni í grun að ekki sé allt með felldu þegar fréttaflutningur heyrist um úrlausn mála milli Alcan og þá starfsmenn sem sagt var upp á sínum tíma, og samkomulagið er leynilegt.

Stéttarfélagið hefur tekið undir að líklega sé þetta góð lausn fyrir alla aðila og hef ég í sjálfu sér enga ástæðu til þess að ætla annað en að rétt sé frá greint af þeirra hálfu. Hins vegar þá gefur málatilbúnaður af þessu tagi tilefni til getgátna og vangaveltna um frekari hótanir af hálfu Alcan.

Séu þessir starfslokasamningar séu ásættanlegir, t.d. að starfsmenn haldi fullum eftirlaunarétti eða einherju hlutfalli af því, eins og þeir hefðu klárað tímann sinn fram að eftirlaunaaldri hjá fyrirtækinu, þá er ekkert við það að athuga og slíkir samningar eðlilegir og ásættanlegir fyrir báða aðila. En af hverju má ekki segja frá því í hverju samningurinn fólst?

Enn einu sinni er launaleyndarvopn atvinnurekandans notað til þess að rjúfa samstöðu fólks. Launaleyndin er ekki aðeins gott vopn í höndum launagreiðenda til þess að geta stýrt launamun kynjanna, sem er ein af meinsemdum nútímans og eldri tíma, heldur er launaleyndin einnig til þess fallin að rjúfa samstöðu launafólks, kljúfa launþegahreyfingar og gera lýðræðislegri umræðu erfitt fyrir.

Í samhenginu við það sem framundan er, líklega atkvæðagreiðslu um stækkun álvers í Straumsvík sem a.m.k. Hafnfirðingar fá að taka þátt í, þá er það svo að hér eru Hafnfirðingar einnig að greiða atkvæði um erlent stórfyrirtæki og starfsmannastefnu þess. Fyrirtækið hefur hreykt sér af hærri launum en gengur og gerist fyrir sambærileg störf. Er herkostnaðurinn af slíku, auk umhverfisspjallanna, framkoman eins og starfsmönnum var sýnd í tengslum við uppsagnirnar? Eru þær leikreglur sem fyrirtækið fer fram á ásættanlegar fyrir íslenskt þjóðfélag eins og við viljum að það sé?

Það skiptir miklu að sanngirni sé í hávegum höfð í þjóðfélaginu, og höfð að leiðarljósi við mótun þjóðfélagsins okkar. Alcan hefur barmað sér gagnvart ósanngjarnri framkomu. Skiptir sanngirni við starfsfólk engu?

Utanríkismál - Er Sjálfstæðisflokkurinn Björn??

2007-01-08T11:28:00.000Z

Björn Bjarnason er dómsmálaráðherra, en með mikinn áhuga á utanríkismálum eins og öllum er ljóst. Á heimasíðu sinni hefur hann birt yfirlit þar sem fram koma tíu atriði sem koma upp í hugann þegar litið er til alþjóðamála. Það er áhugavert að skoða þetta yfirlit út frá áherslum Björna og Sjálfstæðisflokksins alls, en einnig að huga að því hvernig listinn væri hjá öðrum stjórnmálaflokkum, ekki síður hvernig væri minnst á þessi atriði, væru þau yfirfarin af öðrum en Birni. Ég ætla að staldra við eftir hvern og einn punkt, en taka mér þann sama fyrirvara og settur var fram með punktalistanum hjá Birni, að engan veginn er fullrætt um hvern þessara liða.

Stjórnendur Írans og Norður-Kóreu hóta mannkyni með því að vígbúast með kjarnorkuvopnum.
Já, þetta er rétt að einhverju leyti. En svarar ekki "mannkynið" með því að hóta kjarnorkuárásum á Íran? Er auga fyrir auga, tönn fyrir tönn það sem gildir?
Í Mið- og Suður-Ameríku eru í nokkrum ríkjum við völd forystumenn, sem hafa mannréttindi að engu og skelfa þjóðir með ógn og ofbeldi.
Já. Alls staðar í heiminum eru reyndar við völd forystumenn sem hafa mannréttindi að engu, og skelfa þjóðir með ógn og ofbeldi. Ofangreind fullyrðing gildir t.d. einnig um Bandaríkin.
Ofríki og blóðug átök ógna lífi milljóna manna í Afríku.
Já, það er rétt. Þjóðum heims ber að taka höndum saman til þess að koma á friði þarna eins og annars staðar. Tilgangurinn má hins vegar ekki helga meðalið blint, eins og sumir telja að hafi verið rétt í Írak.
Alið er á hatri í garð Vesturlanda og þó sérstaklega Bandaríkjanna og Ísraels meðal múslíma.
Já, í einhverjum tilvikum. Eins má segja: Alið er á hatri í garð múslima á vesturlöndum, þó sérstaklega í Bandaríkjunum og Ísrael.
Orkuvopni er beitt til að knýja þjóðir til undirgefni.
(Þetta skil ég ekki alveg. Eru þetta kjarnorkuvopn sem Björn á við?)
Ýtt er undir óvild milli fólks af ólíku þjóðerni innan Evrópuríkja.
Já, það er gert. Því miður er það einnig gert af Birni sjálfum þegar kemur að öðrum álfum til að mynda. Munum við ekki eftir Falun Gong? Við sjáum líka hvaða afstöðu Björn og Sjálfstæðisflokkurinn hafa til múslima allra.
Skipulögð glæpastarfsemi teygir sig til allra ríkja.
Já. En hvernig á að bregðast við? Er mikilvægast að auka eftirlit og hefta persónufrelsi? Er mikilvægast að koma á heimavarnarliði?
Umræðum um auðlindanýtingu á vísindalegum rökum er hafnað – þjóðir eru settar í skammarkrók með skírskotun til tilfinninga.
Eru Björn og Sjálfstæðisflokkurinn að vísa til Bandaríkjanna og þess að Bandaríkin vilji ekki skrifa undir Kyotobóunina? Er vont að skírskota til tilfinninga og ber þannig eingöngu að beita vísindalegum rökum þegar einstaklingar eða stjórnmálasamtök móta sér skoðanir? Ber að hafna tilfinningarökum? Það finnst mér ekki.
Hræðsluáróður um endalok mannkyns er notaður til að knýja fram aðgerðir gegn gróðurhúsaáhrifum.
Hver er gagnrýnin? Að aðgerðir gegn gróðurhúsaáhrifum séu knúðar fram? Er þetta andúð á hræðsluáróðri? Það getur varla verið, því hluti punkta Björns fela í sér hræðsluáróur um að til sé óvinur, hann sé í múslimum, í Mið og Suður-Ameríku, í Íran og Norður-Kóreu.
Alþjóðleg spákaupmennska eða neikvæð afstaða alþjóðlegra matsfyrirtækja getur haft alvarlegar afleiðingar fyrir einstakar þjóðir.
Já. Það er þess vegna mikilvægt að sporna við áhrifum fjármálamarkaða og fjármálafyrirtækja á hagkerfi þjóðanna og einingar þeirra, svo sem sveitarfélögin. Það er til dæmis hægt með því að draga úr einkavæðingu og auka vægi stjórnunar opinberra aðila á hagkerfið, draga úr vægi markaðsaflanna.

Það má nefna mun fleiri mál en þessi tíu, og ég hefði e.t.v. í einhverjum tilvikum nefnt þau sömu, stundum önnur. Mikilvægast í þessu er þó afstaðan til utanríkisstefnu Íslands og hugmynda um hvernig hún eigi að vera. Hún kemur til dæmis fram í afstöðumun til viðfangsefnanna hér að ofan.

p.s. Ég er sammála Birni um að um hvern þessara tíu punkta megi skrifa lengra mál. Og spurningunni um hvort að stefna Björns Bjarnasonar eins og hún birtist á heimasíðunni sé stefna Sjálfstæðisflokksins er ósvarað. Gaman væri að sjá skoðanir fólks á því.

Uppbyggjandi - jákvæð - og hress

2007-01-08T00:23:00.000Z

Ég hef litið á það sem megindyggð við fólk að geta verið uppbyggjandi, jákvætt og hresst. Ég vil vera þetta allt.

Þess vegna fer ég hress inn í nýja árið á vettvangi mínum í sveitarsrjónarmálunum í Hafnarfirði, fullur bjartsýni á góðan vilja fólks, hvar svo sem í flokki það stendur, til að vinna með mér að mínum hjartans málum og góðum málefnum. T.d. hlakka ég til þess að fjalla um tillögu VG um að veita sérstaka athygli forskönnun barna með lestrarörðugleika. Við lögðum hana fram í umræum um fjárhagsáætlun, en henni var síðan vísað til ráðsins.

Ég hef fulla trú á að tillögunni verði tekið vel af öllum þeim sem með mér starfa í fræðsluráði Hafnarfjarðar.

Vegna góðrar ábendingar

2007-01-08T00:11:00.000Z

Ég fékk í athugasemd ábendingu um að lesa grein á síðu Ungra Jafnaðarmanna í Hafnarfirði. Ég ákvað að færa hana aðeins neðar á síðuna, því mikilvægast finnst mér að fjalla um afglöp ríkisstjórnarinnar og stefnu hennar.

En það er gott að fá athugasemdir. Það er þakkarvert. Greinina las ég og sá að það var greinilega hægt að túlka orð sem ég nota á vef Ögmundar Jónassonar þannig að ég væri að slá okkur vinstri grænum á brjóst fyrir að hafa dregið Samfylkinguna að ákvörðun um að hafa íbúakosningu um öll meiriháttar mál. Það er ekki svo. Það sem ég átti við var að Samfylkingin í Hafnarfirði hefur verið dregin að því að hafa atkvæðagreiðslu um stækkun álversins í Straumsvík. Vinstri græn gerðu það og það hefur enginn dregið í efa mér vitanlega. Mér hefur þó sýnst Samfylkingin í Hafnarfirði kunna því vel að fá tækifæri til þess að geta verið í meirihluta og staðið fyrir slíkri atkvæðagreiðslu.

Fyrrgreint ákvæði var hins vegar sett inn af Samfylkingunni árið 2002 í kjölfar þess að áskoranir íbúa vegna skipulagsins á Hörðuvöllum voru að engu hafðar. Fimm þúsund Hafnfirðingar höfðu mótmælt byggingaframkvæmdunum á Hörðuvöllum, mótmælt byggingu Lækjarskóla sem nú stendur þar. Af þeim ástæðum var ákvæðið sett inn í stefnuskrá Samfylkingarinnar vegna kosninganna 2002. Og það var frábært hjá Samfylkingunni - eins og það er frábært að Össur Skarphéðinsson og Þórunn Sveinbjarnardóttir eru ekki hlynnt stækkun álversins í Straumsvík.

Á þetta atkvæði var hins vegar ekki minnst fyrr en eftir áskorun okkar Vinstri grænna um að efna til hennar. Og svo var það ekki fyrr en löngu síðar, síðari hluta árs 2006 að meirihlutinn dregur samþykkt um atkvæðagreiðslu meðal íbúanna, að farið er af stað með mótun reglna um slíkar atkvæðagreiðslur. Aðferðinni sem þá var beitt finnst mér athugunarverð. Ég veit ekki hvað Þórði finnst um afgreiðsluhætti lýðræðis- og jafnréttisnefndar Hafnarfjarðar á tillögum um atkvæðagreiðslur í Hafnarfirði. Mér fannst að betur nætti vanda til verka. Kannski verður tillögunum vísað aftur til nefndar og þær unnar áfram. Þær þurfa að vera eins góðar og unnt er. Það væri frábært - ef það gerist!

Lýðræði snýst um hvernig við tökum á málum þegar hagsmunir stangast á. Það má ekki stilla fólki upp við vegg eins og Alcan gerir. Stækkunin snýst um svo gríðarlega margt. Hún snýst einmitt alls ekki um bara um deiliskipulag og það er óábyrgt að halda því fram. Hún snýst um framtíð barnanna okkar, um náttúruna á Suðurlandi, um iðnaðarþróun á Íslandi, og fleira og fleira. Atkvæðagreiðsla sem kölluð er lýðræðisleg þarf að vera lýðræðisleg - og það er frábært ef það gerist!

Við Þórður erum sammála um margt. Við erum báðir hernaðarandstæðingar. Við erum báðir iðulega sammála Ögmundi Jónassyni. Við erum báðir í flokkum sem hafa það að markmiði að stefna að samstarfi eftir þingkosningar, fái stjórnarandstaðan til þess umboð kjósenda. Við Vinstri græn erum stundum sammála meirihlutanum í bæjarstjórn Hafnarfjarðar, stundum á móti. Sama gildir um afstöðu- og málefnamun milli Samfylkingar og VG á þingi, í Reykjavík, Árborg og víðar. Við erum sammála um að lýðræðislegar atkvæðagreiðslur skuli efla. Ég vil að vandað sé til verka. Það vill Þórður áreiðanlega líka - ég trúi bara ekki öðru. Látum atkvæðagreiðsluna ver vel heppnaða. Það væri frábært - ef það gerist!

Ég vona að Þórður geti verið sammála mér um að málefnaleg sérstaða Samfylkingarinnar og Vinstri grænna er nokkur, hvor flokkur fyrir sig hefur sín sérkenni, og á fullan rétt á því að draga þann málefnalega mismun fram í dagsljósið. Þeir sem stefna að samstarfi þurfa í senn að vita um hvað þeir eru sammála og um hvað ósammála. Við skulum stefna að því saman. Það er frábært - ef það gerist!

Um hákólaprófessorinn Hannes - skipulag umferðar - bandaríska leiðin

2007-01-04T23:29:00.000Z

Enn einu sinni sýnir Hannes Hólmsteinn Gissurarson háskólaprófessor, vanhæfni sína í grundvallaratriðum. Allir muna eftir Laxness-ævintýrinu, þar sem prófessornum skrikaði aðeins fótur á svelli fræðanna, þegar kom að heimildavísunum og -úrvinnslu. Nú rann hinn fóturinn til og Hannes því á rassin, þegar hann skilur ekki muninn á miðgildi og meðaltali, sem telst einnig til grundvallaratriða, sérstaklega í deild Hannesar. Stefán Ólafsson nefnir þetta í stuttri leiðréttingu.
---------------
Núna er umferðin aftur að aukast sunnan úr Hafnarfirði, Garðabæ, Kópavogi og inn í Reykjavík. Í Ameríku voru akreinar sem voru forgangsakreinar. Á þeim máttu aðeins aka þeir sem voru í bíl tveir eða þrír saman, eftir atvikum. Mætti ekki hugsa sér að bæta við akrein á þessari bæjarleið og leyfa forgang þar fyrir strætó. leigubíla og alla þá bíla sem í eru t.d. þrír eða fjórir? Ég er viss um að slík aðgerð skil miklu til umhverfisins, miklum sparnaði í vegaviðhald, sparnaði í tíma og síðas en ekki síst glaðara fólki í upphafi dags, því umferðin gekk greiðar en í dag.

Fortíðarþrá einstakra stjórnmálaflokka

2007-01-03T13:02:00.000Z

Það er ótrúlegt hversu mikil fortíðarþrá einstakra stjórnmálaflokka er. Björn Ingi Hrafnsson þráir fortíðina, eins og kemur vel í ljós á blogginu hjá honum. Hann þráir að hlusta á Steingrím Jóhann Sigfússon tjá sig um lýsingar Margrétar Frímannsdóttur á samskiptum hans við sig.

Það er eins og Björn telji það hafa úrslitaáhrif hvort Steingrímur taki undir eða andmæli Margréti.

Ég man til þess að Margrét lýsti bókinni sem lýsingu á atburðum eins og þeir komu henni fyrir sjónir. Hennar lýsing skiptir miklu máli fyrir stjórnmálasögu vinstrimanna og krata á Íslandi. Ég bíð auðvitað spenntur eftir því að fyrir almenningssjónir komi saga þeirra sem er getið í bók Margrétar. Atburðarásin frá þeirra bæjardyrum. Hún skiptir hins vegar litlu fyrir viðfangsefni nútímastjórnmála, sem snúast um framtíðina.

Mér finnst mótsögn felast í fortíðarþrá framsóknar, nema kannski að þangað getur hún sótt fylgið - til sögunnar.

2007-01-02T10:04:00.000Z

Það er greinilegt hvaða merking er lögð í orðin grímulaus, hjá forsvarsmönnum Alcan.

Í orðunum grímulaus felst óskammfeilin barátta auðmagns, þar sem saman skipa sér Landsvirkjun, Alcan, sitjandi ríkisstjórn, og einhverjir sveitarstjórnarmenn sem eru hliðhollir stóriðjustefnu ríkisstjórnarinnar.

Í orðunum grímulaus felst til dæmis þetta, auk mútugjafa álbræðslunnar í Straumsvík.

Hinu megin sitja náttúruverndarsamtök, frjálsir félagahópar, Vinstri græn, og fleiri.

Það er ágætur pistill að norðan, sem ágætt er að vekja athygli á.

Hin rétta merking orðsins grímulaus þýðir að maður komi hreint fram með sjónarmið sín, komi til dyranna eins og maður er klæddur. Hafa allir gert það??

Undir lok ársins

2006-12-29T10:44:00.000Z

Í dag var seinasti vinnudagur ársins. Hann leið með tiltekt og með yfirferð yfir ókláruð mál. Áramótin eru að skella á og nýja árið nálgast óðfluga.

Um áramót er gjarna litið um öxl og skoðað það sem upp úr stóð á árinu. Ég ætla að reyna að telja eitthvað upp og ekki er það í mikilvægisröð, auk þess sem bæði eru persónulegar og almennar upplifanir:

- Ferð til Bandaríkjanna og til Miklagljúfurs. Það var stórfengleg upplifun þar sem rúsínan á pylsuendanum var heimsóknin í Williams, pínulítinn smábæ með veitingahúsi þar sem fá mátti íslenskan þorsk, og amerísk pæ

- Kosningasigur VG í sveitarstjórnum, í Reykjavík, Árborg, Dalbyggð, Kópavogi, svo fátt eitt sé nefnt, en ekki síst í Hafnarfirði þar sem fylgi er fjórfaldað frá því síðast.

- Hleypt á Lónið við Kárahnjúka

- Davíð Oddsson og Halldór Ásgrímsson láta af störfum og erfðaprinsar flokkanna kynntir, þeir Illugi Gunnarsson og Björn Ingi Hrafnsson. Báðir voru þeir aðstoðarmenn þegar þægð gagnvart Bandaríkjunum og Íraksstríðið var staðfest í óþökk annarra Íslendinga.

- Röksemdafærsla ársins var síðan: Forsendurnar voru rangar og ákvarðanirnar sem teknar voru á grundvelli þeirra voru því rangar eða mistök.

Auðvitað er margt fleira. Þetta er það sem ég man eftir í svipinn.

Afmælisdagur - Gjöf frá Alcan

2006-12-27T22:36:00.000Z

Í dag á ég afmæli. Ég þakka fyrir þær kveðjur sem ég fékk í dag frá vinum og vandamönnum. Ég fékk bókina Um Sigurhæðir frá Dóru, U2 DVD og geisladisk frá krökkunum mínum.

Ég fékk líka annan disk: Björgvin Halldórsson. Það var ekki afmælisgjöf til mín, heldur gjöf frá Alcan í tilefni af afmæli þess.

Ég get vel tekið við gjöfum barna minna og eiginkonu. Mér þykir vænt um þau og þeim um mig. Við gefum hvoru öðru oft gjafir. Alcan hefur ekki gefið mér gjöf áður. Ekki þegar það hefur átt afmæli, hvað þá ég.

Einhver sagði Æ sér gjöf til gjalda. Ég held að Rannveig Rist og Alcan séu að vonast til þess að mér snúist hugur um afstöðu mína til stækkunar álversins. Ef ég þigg diskinn, þá er ég að gefa út röng skilaboð til Alcan. Rannveig heldur þá að ég sé hlynntur fyrirtækinu og launi gjöfina með velvild minni gagnvart fyrirtækinu og stækkuninni.

Þess vegna skila ég gjöfinni frá Alcan.
(p.s. ætli bæjarstjórinn og aðrir í meirihlutanum í Hafnarfirði sé með sitt eintak á fóninum??)

Gleðileg jól!

2006-12-22T15:16:00.000Z

Eg óska öllum gleðilegar og góðar jóla. Ég þakka allt liðið og hlakka til næsta árs.

Góðar kveðjur,

Gestur Svavarsson